"Çox böyük təəssüf hissi ilə qeyd etmək lazımdır ki, hələ də Cənubi Qafqazda sülhün və təhlükəsizliyin təmin olunmasında kifayət qədər təhdidlər var".
Bu sözləri AZXEBER.COM-a açıqlamasında Milli Məclisinin deputatı Fəzail Ağamalı Fransanın növbəti dəfə Ermənistanı silahlandırmasından danışarkən deyib.
Deputat hesab edir ki, Fransa bu hərəkətləri ilə Azərbaycana qarşı hələ də qərəzli mövqeyini ortaya qoyur:
"Bir tərəf ABŞ Ermənistana yardım aktı qəbul edir, eyni zamanda ona siyasi və maddi dəstək verməyi önə çəkir. Başqa bir tərəfdən isə Fransa hələ də Azərbaycana qarşı qərəzli düşmənçiliyini, ölkəmizə qarşı böhtan dolu münasibətlərinə ara verməməklə yanaşı, həm də Ermənistanı silahlandırmaqda davam edir. Əlbəttə, bütün bunların başlıca səbəbi Ermənistandır. Əgər Ermənistan bir tərəfdən özünü xilas etmək, digər tərəfdən Cənubi Qafqaz regionunda sülhün, əmin-amanlığın, təhlükəsizliyin təmin edilməsini reallaşdırmaq üçün qonşuları ilə münasibətləri normallaşdırmalıdır. Dəfələrlə deyilib, bir daha təkrar edirəm ki, Ermənistanın gələcəyi onun Türkiyə və Azərbaycanla normal münasibətlərindən keçir. Heç bir ölkə Ermənistanı silahlandırmamalı və onun militalist ölkəyə çevirməməlidir".
Deputat bildirib ki, yeni müharibə təhlükəsi yaranarsa, düşmən yenidən dəmri yumruğu başında görəcək:
"30 ildən çox Rusiya bütün hərbi potensialı ilə Ermənistanın yanında oldu. Unutmaq olmaz ki, dünyanın silah potensialına, istehsalına, müasirliyinə görə Rusiya dünyada ilk yerdədir. Həmin silahların xeyli hissəsi Ermənistanda yerləşdirilmişdi. Hətta onlara pulsuz silahlar da verilmişdi. 44 günlük Vətən Müharibəsində biz onların hansı silahlara malik olduğunun şahidi olduq. Lakin Müzəffər Ali Baş Komandan və igid silahlı qüvvələrimiz böyük qəhrəmanlıqla onların həm silahlarını, həm də ordusunu məhv etdi. Bundan sonra Ermənistan silahlansa nolacaq?! Onun Azərbaycana qarşı müharibə etmək imkanımı qalıb?! Əgər onlar Azərbaycana qarşı yenidən ərazi iddialarında olsa, Azərbaycanın sülh şərtlərini yerinə yetirməsə, revanşizmi ortaya qoysa, qarşısında dəmir yumruğu görəcək.
Modernləşmiş, güclü və bu gün hətta Pentaqonun öyrənməli olduğu Azərbaycanın hərbi gücünün qarşısında dayanmalı olacaq. Hansı formada, şəkildə Fransa ona yardım edəcək? Necə? Mümkün deyil. Ona görə də biz çox diqqətlə prosesləri izləməliyik. Fransanın və onun kimi dövlətlərin Cənubi Qafqazda yeni müharibə alovuna rəvac verməsi diqqətimizdən kənarda qalmalı deyil. Ancaq bütün bunlar yalnız Ermənistanı fəlakətə aparır. Heç bir qüvvə cənab Prezident İlham Əliyevin dediyi kimi, Azərbaycanla zorla, güc dili ilə danışa bilməz. Ermənistan yaşamaq istəmək istəyirsə, Azərbaycanla münasibətləri normallaşdırmalıdır. Vaxtilə işğal etdiyi Qazaxın 7 kəndini və Naxçıvanın 1 kəndini heç bir şərt qoymadan dərhal geri qaytarmalıdır. Bunu etmirsə, bizim silahlı qüvvələrimiz üzərinə düşən missiyanı yerinə yetirəcəkdir".
Məsələ ilə bağlı AZXEBER.COM-a danışan politoloq Qabil Hüseynli isə yaranmış bu cür halın heç bir müharibə ocağı yarada
bilməyəcəyinə işarə edib:
"Mən müharibə variantını istisna edirəm. Hazırda bütün diqqətlər sülh müqaviləsinin bağlanmasına yönəlib. Ermənistan o halda deyil ki, Azərbaycanla müharibə aparsın. Ermənistanın hələ Azərbaycanla döyüşə hazırlığı üçün, ordunun vəziyyətinin yaxşılaşdırması üçün ən azı 5-10 il vaxt lazımdır. Ona görə də Ermənistanla Azərbaycan arasında hər hansı qarşıdurmanın olması birmənalı şəkildə absurddur. İki ölkə arasında sərhədlərin delimitasiya və demarkasiya məsələsi müzakirə edilir. Digər sülh yaratma prosesləri davam etdirilir. Bu səbəbdən də müharibənin yenidən başlaması ilə bağlı danışmaq yersizdir".
Siyasi şərhçi təkcə Fransanın deyil, həm də Hindistanın Ermənistanı silahlandırması məsələsinə münasibət bildirirək deyib ki, ermənilər silahı pulla alır:
"Düzdür, erməni öz xislətində qalır. Lakin onların daha müharibə üçün halları yoxdur. Ölkə daxilində xaos, Rusiyanın onlara qarşı ciddi təzyiqləri var. Bu cür vəziyyətdə Ermənistanın hücuma keçəcəyi, müharibə təhlükəsi yaratması gözlənilmir. Fransa ermənipərəst, alçaq bir ölkədir. Qatı xristianlığı təbliğ edən ölkədir. Burada Ermənistan və Fransanın tarixi əlaqələri var. Makronun dövründə ölkə beynəlxalq hüququn normalarını tamamilə pozdu. Fransa 600 min erməni əhalisinin təsiri altında yaşayan bir ölkədir. Amma onlar heç nə edə bilməz. 5-6 dənə köhnə silahla Ermənistanın vəziyyəti yaxşılaşa bilməz. Azərbaycan Ordusu kifayət qədər güclüdür və yeri gəlsə təcavüzkarı yerində oturda bilər.
Hindistan silahları Fransa ilə birgə istehsal edir. Hindistan bizim dostumuz deyil və Pakistanın acığına bu hərəkətləri edir. Ermənilər də pul vasitəsilə silahları alır".
Mikayıl Mirzəzadə
Yazı Medianın İnkişafı Agentliyinin "Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi" mövzusunda dərc edilib.
