Fransada qan məhsullarının saxlandığı soyuq anbarlar kiberhücuma məruz qalıb.
AZXEBER.COM xarici mediya istinadən xəbər verir ki, hücum edən şəxslər normalda −30°C temperaturda işləyən soyutma sistemlərinin göstəricilərini 110°C-yə qədər yüksəldiblər.
Hadisə nəticəsində xəstələrə çatdırılmalı və dərman istehsalında istifadə olunmalı plazmaların da saxlandığı üç müəssisə zərər görüb.
Lakin xəbərdarlıq sistemlərinin vaxtında işə düşməsi və texniki işçinin müdaxiləsi sayəsində məhsulların məhv olmasının qarşısı alınıb. Fransa Qan İnstitutu (EFS) heç bir qan məhsulunun itirilmədiyini açıqlayıb.
Bununla belə, sözügedən hücumlar təkcə bir hadisə ilə məhdudlaşmır.
Oktyabr ayında Fransada 700-dən çox marketin soyutma sistemləri oxşar kiberhücumlara məruz qalıb. Nəticədə yararsız hala düşən ərzaq məhsulları məhv edilib.
Noyabrın əvvəlində isə hücumlar Avropanın azı 11 ölkəsinə yayılıb. Marketlərin soyuducu və dondurucularının temperatur parametrləri məsafədən dəyişdirilib. Bəzi müəssisələrdə ərzaq məhsullarının atılması zərurəti yaranıb.
Hələlik hücumların arxasında kimin dayandığı müəyyən edilməyib.
