Gənc müğənni Ramin Şövkətov qayıtdı

MAQAZİN

14:08 06.08.2012

2048

Gənc müğənni Ramin Şövkətov artıq iş başına dönüb.

İfaçı AZXEBER.COM-a açıqlamasında yeni mövsümə hazırlaşdığını bildirib. Bir neçə mahnı üzərində çalışan Ramin sentyabr ayında daha bir kompozisiyanı dinləyicilərə təqdim edəcək. Qeyd edək ki, bu dəfə o fərqli üsluba müraciət etmək fikrindədir: “Bir neçə mahnı üzərində seçim edirik, amma demək olar ki, bəllidir, sadəcə dəqiqləşdirəcəyik”. Müğənni hələlik bəstəkarın adını sirr saxlayaraq, təkcə sevilən və populyar musiqiçi olduğunu bildirib: “Son ifa etdiyim “İkimiz” mahnısı dinləyicilər tərəfindən çox sevildi. Bu, ritmik, əsl yay əhval-ruhiyyəsinə uyğundur. Yeni mahnımız isə lirika olacaq”. Müğənni Pərviz Mahmudovun Leylinin şeirinə bəstələdiyi və Hakan Erolun aranjeman etdiyi “İkimiz” mahnısının ekran versiyasını da hazırlamaq niyyətindədir. Belə ki, bunun üçün o, kameralar qarşısına çıxmağa hazırlaşır: “Bundan əvvəl ifa etdiyim mahnılardan birini də Nail Naiboğlu ekranlaşdırıb. “İkimiz” mahnısının klipini lentə almaq üçün yenidən ona müraciət edəcəyəm”. R.Şövkətovun sözlərinə görə klipin süjeti haqqında onun öz təsəvvürləri də var. Ola bilər ki, müğənninin öz ideyalarından da istifadə edilsin. Qeyd edək ki, artıq çəkiliş məkanları və geyim axtarışlarına başlanılıb. Ramin sentyabr ayında televiziya kanallarından birində yeni başlayacaq verilişin ilk qonağı olacağını da əlavə edib. Proqramın yaradıcı heyəti “İkimiz”in məhz ilk buraxılışda səslənməsini istəyib: “Sevilən aparıcı və müğənni Ədalət Qəhrəmanlının “Tez bazar” adlı yeni maraqlı və əyləncəli verilişi yayıma başlayacaq. Şəhərin məşhur istirahət və əyləncə mərkəzlərindən birində çəkiləcək verilişin ilk qonağı olacağıma sevinirəm”. Diqqətinizə çatdıraq ki, Ədalət Qəhrəmanlı “İkimiz” mahnısını çox bəyəndiyini və proqramda müğənnidən məhz bu mahnını ifa etməsini xahiş edib”. Müğənni həmçinin kompozisiyanın Nail Naiboğlunun “Lider” telekanalında efirə gedəcək “Mahnı-2012” layihəsində də uğur qazanacağına əminliyini bildirib. Onun sözlərinə görə “Mahnı-2012”də “İkimiz” mahnısının rəqqaslarla təqdimatı onun çıxışına bir rəng qatıb.