Göyçay İcra Hakimiyyəti tərəfindən təşkil olunacaq “Nar bayramı”na ciddi hazırlıq işləri gedir.
AZXEBER.COM xəbər verir ki, tədbir zamanı rayonda nar məhsullarının istehsalı ilə məşğul olan müəssisələrin məhsullarından ibarət yarmarka, kəndli fermerlər tərəfindən yetişdirilən müxtəlif nar sortları və onlardan hazırlanan məhsulların sərgisi, eləcə də nar ilə bağlı müxtəlif müsabiqələr, oyunlar təşkil ediləcək. Tədbirdə ən böyük nar nümayiş olunacaq.
Öz rəngarəngliyi və fərqliliyi ilə seçiləcək bu ilki “Nar Bayramı”nda İtaliyada Patisseri şəbəkəsinin sahibi Gianni de Carlo bayram münasibətilə Göyçay nar suyunun əlavə olunduğu xüsusi piroq və tort resepti hazırlayıb. Hazırlanmış piroq və tort “Nar Bayramı”nda təqdim olunacaq və İtaliyada təqdim olunan menyulara daxil ediləcək.
Tədbirdə dövlət və hökumət nümayəndələri, millət vəkilləri, özəl qurumların nümayəndələri, icra başçıları, media qurumları, bir sıra xarici ölkə səfirləri, beynəlxalq təşkilatların nümayəndələri, ictimai-siyasi xadimlər, QHT nümayəndələri, sənət adamları, Azərbaycanda təhsil alan xarici tələbələr iştirak edəcəklər.
Xatırladaq ki, Türkiyənin tanınmış müğənnisi Doğuş da Nar bayramında iştirak edəcək. O öz ifasıyla göyçaylıları sevindirəcək. Bundan başqa Türkiyənin aparıcı media orqanlarının nümayəndələri də “Nar Bayramı”na qatılacaqlar.
Qeyd edək ki, tədbirin aparıcısı tanınmış şoumen Murad Dadaşov olacaq.
Bayram tədbiri ölkənin tanınmış incəsənət ustalarının çıxışları və atəşfəşanlıqla başa çatacaq.
