"2017-ci il bizim üçün tarixi il oldu. Çünki yeni stadiona köçdük. Bu isə 50 ildən bir olan hadisədi”.
Apasport.az saytı xəbər verir ki, bu sözləri "Atletiko”nun prezidenti Enrike Serezo deyib.
Madrid təmsilçisinin rəhbəri AS nəşrinə müsahibə verib. Geridə qalan ili dəyərləndirən Serezo ötən mövsümü özləri üçün uğurlu hesab edir: "Ötən mövsüm La Liqada 3-cü yeri tutduq, Çempionlar Liqasında isə yarımfinala qədər irəlilədik. Buna görə 2017-ci ili tarixi, "Atletiko” üçün ən yaxşı illərdən biri hesab edirəm”.
Serezo söhbət əsnasında komandasının cari mövsümdə Çempionlar Liqasındakı uğursuz çıxışına da münasibət bildirib. O, növbəti dəfə "Qarabağ”la qarşılaşmaları yada salaraq, "Atletiko”nun qrupda qalmasını bununla əlaqələndirib: "Bu mövsüm Çempionlar Liqasında mübarizəni erkən dayandırmağımız bizim üçün ağır zərbə oldu. Düşünürəm ki, bəxtimiz gətirmədi, şanssızlıq yaşadıq. Romada keçirdiyimiz ilk oyunda qələbə qazanmalı idik. Çünki həmin matçda xeyli sayda qol epizodu yaratmışdıq. "Qarabağ”la qarşılaşmaları da yada salmaq istərdim. Onlarla hər iki görüşədə heç-heçə etdik. Halbuki bunların birində qalib gələ bilərdik. "Qarabağ”ı məğlub edə bilmədiyimiz üçün məqsədimizə çatmaq mümkün olmadı”.
Futbol funksioneri Avropa Liqasını qazanmağı hədəflədiklərini sözlərinə əlavə edib. Futbolu bir tapmaca adlandıran Serezo "Qarabağ”ın Çempionlar Liqasında qrupa vəsiqə qazanmasını nümunə göstərib: "Komanda üzləşdiyi çətinlikləri geridə qoymalıdı. İndi biz Avropa Liqasında oynayacağıq. Çempionlar Liqasında olduğu kimi, Avropa Liqasını da qazanmaq üçün eyni istəyi göstərəcəyik. Avroliqada da yaxşı komandalar mübarizə aparır. Eyni anda 3 turnirdə yarışırıq və mövsümü titulla başa vurmaq istəyirik. Görün, "Qarabağ” nə etdi?! Futbol bir tapmacadı”.
Qeyd edək ki, Çempionlar Liqasında "Çelsi”, "Roma” və "Qarabağ”la eyni qrupda mübarizə aparan "Atletiko” 3-cü yeri tutaraq, Avropa Liqasında oynamaq hüququ qazanıb. İspaniya nəhəngi "Qarabağ”la Bakıda 0:0, Madriddə isə 1:1 hesablı heç-heçə oynayıb.
