Yay aylarında yüksək temperaturla yanaşı müşahidə olunan güclü küləklər şəhər sakinləri üçün gözlənilməz təhlükələr yarada bilər. Xüsusilə çoxmərtəbəli binalarda yaşayanlar, həyət evlərinin sahibləri, açıq ərazilərdə çalışanlar və sürücülər belə hava şəraitində daha diqqətli olmalıdır.
Küləyin yaratdığı risklər hər zaman gözlə görünmür. Balkonda qalan kiçik bir əşya, köhnə binanın damından qopan material və ya küçədəki zəif konstruksiya ciddi təhlükəyə çevrilə bilər.
AZXEBER.COM güclü külək zamanı diqqət edilməli əsas məqamları təqdim edir.
Balkon və pəncərələrdə təhlükə yaradan əşyalar
Çoxmərtəbəli binalarda yaşayan sakinlər küləkli havalarda xüsusilə balkon və pəncərələrə diqqət etməlidir. Balkonda saxlanılan dibçəklər, yüngül mebellər, dekorativ əşyalar və digər predmetlər güclü küləyin təsiri ilə yerindən qopa bilər. Hündür mərtəbədən düşən hər hansı əşya aşağıda hərəkət edən insanlar üçün ciddi təhlükə yarada bilər. Eyni zamanda açıq qalan pəncərələr küləyin təsiri ilə çırpılaraq şüşələrin sınmasına səbəb ola bilər. Mütəxəssislər küləkli havalarda balkonlardakı əşyaların bərkidilməsini, mümkün olduqda isə qapalı yerlərə yığılmasını tövsiyə edir.
Köhnə binaların dam və fasadları risk yaradı
Güclü külək zamanı əsas təhlükə mənbələrindən biri köhnə tikililərin dam və fasad hissələridir. Vaxt keçdikcə zəifləyən dam örtükləri, fasad elementləri və izolyasiya materialları küləyin təsiri ilə qopa bilər. Belə hallarda bina ətrafında hərəkət edən şəxslər fasada yaxın dayanmaqdan çəkinməlidir. Çünki yüksəklikdən düşən kiçik bir material belə insan sağlamlığı üçün ciddi nəticələrə səbəb ola bilər.
Həyət evlərində əvvəlcədən tədbir görmək vacibdir
Küləkli hava yalnız şəhər binalarında yaşayanlar üçün deyil, həyət evlərinin sakinləri üçün də risk yaradır. Dam örtükləri, çardaqlar, metal konstruksiyalar və hasarlar əvvəlcədən yoxlanılmalıdır. Həyətdə olan quru ağac budaqları kəsilməli, küləyin təsiri ilə uça biləcək əşyalar isə təhlükəsiz yerə yığılmalıdır. Çünki bəzən adi görünən bir əşya güclü külək zamanı təhlükəli obyektə çevrilə bilər.
Küçədə hansı ərazilərdən uzaq durmaq lazımdır?
Küləkli havalarda açıq ərazilərdə hərəkət edən şəxslər ağacların altında dayanmaqdan çəkinməlidir. Quru və zəif budaqlar küləyin təsiri ilə qopa bilər. Bundan əlavə, reklam lövhələri, tikinti sahələri, şüşəli fasadlar və müvəqqəti qurğuların yaxınlığında ehtiyatlı olmaq lazımdır. Xüsusilə tikinti gedən ərazilərin yanından keçərkən təhlükəsizlik məsafəsi qorunmalıdır.
Sürücülər üçün əsas risklər
Güclü külək avtomobil idarə edən şəxslər üçün də əlavə çətinlik yaradır. Xüsusilə açıq yollarda və körpülərdə yan küləklər avtomobilin hərəkət istiqamətinə təsir göstərə bilər. Belə hava şəraitində sürət azaltmaq, sükanı daha diqqətlə idarə etmək və avtomobili ağacların, reklam lövhələrinin və digər təhlükə yarada biləcək obyektlərin altında saxlamamaq tövsiyə olunur.
Qırılmış elektrik naqillərinə yaxınlaşmaq olmaz
Küləyin təsiri ilə elektrik xətlərinin zədələnməsi də təhlükəli vəziyyət yarada bilər. Yerə düşmüş naqillərə toxunmaq və həmin əraziyə yaxınlaşmaq həyati risk daşıyır. Belə hallarda ərazidən uzaqlaşmaq və aidiyyəti qurumlara məlumat vermək lazımdır. Elektrik avadanlıqlarında yaranan nasazlıqlara isə özbaşına müdaxilə etmək təhlükəlidir. Güclü külək zamanı əsas qayda sadədir: təhlükəni əvvəlcədən görmək və riskli ərazilərdən uzaq durmaq lazımdır.
Fəridə Əsədzadə
