Göygöl rayonunda aqrar sektorun inkişafı istiqamətində yeni layihələr həyata keçirilir.
AZXEBER.COM xəbər verir ki, Prezident İlham Əliyevin aqrar sektorun inkişafı, ərzaq təhlükəsizliyinin möhkəmləndirilməsi və qeyri-neft sektorunun genişləndirilməsi ilə bağlı müəyyən etdiyi vəzifələr çərçivəsində Göygöldə kənd təsərrüfatı sahəsində bir sıra layihələr icra olunur.
Göygöl Rayon İcra Hakimiyyətinin başçısı Vüqar Novruzov və Prezident Administrasiyasının məsul əməkdaşı Ziya Məmmədov "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” çərçivəsində görülən işlərlə tanış olublar.
Səfər zamanı ərzaqlıq buğda istehsalının artırılması, intensiv moruqçuluğun inkişafı və heyvandarlıq təsərrüfatlarının genişləndirilməsi istiqamətində həyata keçirilən layihələrə baxış keçirilib.
Sahibkar Rafail Mustafayev 250 hektar sahədə 1375 ton buğda istehsal etməyi, yəni hər hektardan 60 sentner məhsul götürməyi planlaşdırır. Artıq 50 hektar ərazidə şum işləri aparılıb.
Digər sahibkar Taleh Hüseynov isə 200 hektar sahədə 1000 ton buğda istehsal etməyi və iki pivot suvarma sistemi quraşdırmağı nəzərdə tutur. Təsərrüfatda 50 hektar sahədə şum işləri görülüb.
Rayonda intensiv moruqçuluğun inkişafı istiqamətində də işlər davam etdirilir. Qoşqar Rzayev 6 hektar, Fuad Zalov isə 8 hektar ərazidə intensiv moruqçuluq təsərrüfatı yaradıb. Təsərrüfatlarda damcı suvarma sistemləri quraşdırılıb. Əlavə torpaq sahələrinin alınaraq təsərrüfatların genişləndirilməsi planlaşdırılır.
Heyvandarlıq sahəsində də yeni layihələr həyata keçiriləcək. Bəhruz Mustafanın Avstriyadan 100 baş Simmental cinsli ətlik heyvan gətirməsi planlaşdırılır. Layihə nəticəsində ət istehsalının 37 ton artacağı gözlənilir.
Yaşar Məmmədzadənin isə Almaniyadan Holşteyn-Friz cinsli südlük heyvanlar alması nəzərdə tutulur. Bununla süd istehsalının illik 390 min litr artırılması planlaşdırılır.
Məlumata görə, hər iki layihə üzrə hazırlıq işləri aparılır. Layihələrin 2026-cı ilin avqustundan başlanaraq 2028-ci ilin dekabrında başa çatdırılması nəzərdə tutulur.
Baxış zamanı sahibkarlarla görüşlər keçirilib, onların fəaliyyəti və gələcək planları ilə maraqlanılıb, qarşılaşdıqları problemlər və təklifləri dinlənilib. Dövlət tərəfindən təqdim olunan subsidiya, güzəştli maliyyələşmə və digər dəstək mexanizmlərindən səmərəli istifadənin vacibliyi vurğulanıb.
Daha sonra Rayon İcra Hakimiyyətinin inzibati binasında kənd təsərrüfatı məhsullarının istehsalı və emalı ilə məşğul olan təsərrüfatların, emal müəssisələrinin, aidiyyəti dövlət qurumlarının yerli nümayəndələrinin və "Əlaqələndirmə Qərargahı”nın üzvlərinin iştirakı ilə görüş keçirilib.
Görüşdə Dövlət Proqramı çərçivəsində həyata keçirilən tədbirlər və zona müşavirəsində irəli sürülən təşəbbüslərin icra vəziyyəti müzakirə olunub.
Göygöl rayonunda ərzaqlıq buğda istehsalının artırılması, intensiv moruqçuluğun genişləndirilməsi və heyvandarlığın inkişafı istiqamətində işlərin davam etdiriləcəyi bildirilib.
