Göygöl Rayon İcra Hakimiyyətinin başçısı Vüqar Novruzov ali məktəbə yüksək balla qəbul olub tələbə adı qazanan məzunlarla görüş keçirilib. Görüşdə millət vəkili Kamran Bayramov, Təhsil sektorunun müdiri Elnur Qasımov, TİAHİ Göygöl rayon komitəsinin sədri Elnur Hacıyev iştirak edib.
AZXEBER.COM xəbər verir ki, öncə Ümummilli Lider Heydər Əliyevin abidəsi ziyarət edilərək xatirəsi böyük ehtiramla anılıb.
Görüş zamanı Möhtərəm Prezidentimiz cənab İlham Əliyevin təhsilin inkişafına göstərdiyi xüsusi diqqət və qayğıdan, bu sahədə həyata keçirilən genişmiqyaslı islahatlardan bəhs edən icra başçısı tələbə adını qazanmış gəncləri səmimi qəlbdən təbrik edərək onlara gələcək fəaliyyətlərində uğurlar arzulayıb.
Milli Məclisin deputatı çıxışında gənclərə qarşıdakı tələbəlik həyatlarında uğurlar arzulayaraq, seçdikləri ixtisaslar üzrə yüksək bilik və bacarıqlara yiyələnmələrinin, ölkəmizin inkişafına layiqli töhfə vermələrinin vacibliyini vurğulayıb.
Təhsil sektorunun müdiri, TİAHİ Göygöl rayon komitəsinin sədri və digər natiqlər çıxış edərək məzunların qəbul imtahanlarında göstərdikləri nəticələrdən, rayon üzrə ali məktəblərə qəbul göstəricilərindən və təhsil sahəsində həyata keçirilən tədbirlərdən danışaraq, yüksək nəticə göstərən şagirdlərin müəllim və valideynlərinin zəhmətini xüsusi qeyd edib, tələbə adını qazanan bütün məzunları təbrik ediblər.
Gənclər çıxışlarında təhsilin inkişafına göstərilən dövlət qayğısından və onların uğur qazanması üçün yaradılan geniş imkanlardan söz açaraq, bu diqqət və dəstəyə görə ölkə rəhbərinə minnətdarlıqlarını bildiriblər. Onlar qazandıqları uğurlarda müəllimlərinin böyük əməyini xüsusi qeyd edib, görüşün təşkilinə görə Göygöl Rayon İcra Hakimiyyətinin rəhbərliyinə təşəkkürlərini ifadə ediblər.
Qeyd edək ki, Vətən müharibəsi şəhidi Ceyhun Niftəliyevin qızı Ayan Niftəliyeva rayon üzrə ən yüksək balla Ali məktəbə qəbul olaraq tələbə adını qazanıb.
Tələbə adını qazanmış gənclərə qiymətli hədiyyələr təqdim edilərək, xatirə fotosu çəkdirilib.
