Hindistanın Mumbay şəhərindəki Chhatrapati Shivaji Maharaj Beynəlxalq Hava Limanında Tailanddan olan sərnişin 95 ekzotik heyvan daşıyarkən tapılıb.
AZXEBER.COM "The Indian Express” qəzetinə istinadən xəbər verir ki, Banqkokdan Mumbaya gələn sərnişin hava limanında saxlanılaraq gömrük əməkdaşları tərəfindən sorğu-sual edilib.
Sərnişin sorğu-sual zamanı əsəbilik nümayiş etdirəndə səlahiyyətlilər onun baqajını yoxlamağa başlayıblar.
Baqajın yoxlanışı nəticəsində 2 müxtəlif növ tarantula, 30-u ölü, 50-si diri olmaqla 80 iquana, 1 Malay ayısı, 2 qırmızıayaqlı tısbağa, 6 uçan dələ, 2 müxtəlif növdən ölü günəş quşu və 2 yalçıq quş aşkar edilib.
Gömrük rəsmisi nəsli kəsilməkdə olan və ticarəti qadağan edilən bu heyvanların qaçırıldığını və sərnişinin nəzarətə götürüldüyünü bildirib.
Səlahiyyətli şəxs şübhəlinin daha əvvəl də oxşar cinayətlərdə iştirak edib-etmədiyini araşdırdıqlarını, həmçinin sözügedən qaçaqmalçılıq fəaliyyətində iştirak edən şəxslərin və ya qrupların kimliyini müəyyənləşdirməyə çalışdıqlarını bildirib.
Gülay
