MTN məsələ ilə bağlı açıqlama yaydı
Milli Təhlükəsizlik Nazirliyi həbsxanadan qaçan məhkumla bğlı məlumat yayıb. Nazirliyin mətbuat xidmətindən daxil olan məlumata görə, dekabr ayının 8-də saat 21 radələrində Ədliyyə Nazirliyi Penitensiar Xidmətin Qaradağ rayonu ərazisində yerləşən 2 saylı məntəqə tipli cəzaçəkmə müəssisəsindəki (MTCM) məhkumlarla əlaqədar baş vermiş insident və həmin məhkumlardan birinin - Bakı şəhər sakini, 1983-cü il təvəllüdlü Fərəcov Faiq Fuad oğlunun MTCM-dən qaçması barədə Milli Təhlükəsizlik Nazirliyinə məlumat daxil olub. Faktla bağlı Milli Təhlükəsizlik Nazirliyinin müvafiq əməliyyat strukturlarına tapşırıqlar verilmiş və Faiq Fərəcovun tutulması istiqamətində zəruri əməliyyat-axtarış tədbirləri həyata keçirilmişdir. 2011-ci il dekabr ayının 9-da axşam saat 20:30 radələrində Bakı şəhəri, Yasamal rayonu, Şəhriyar küçəsində yerləşən “Asfar” qapalı futbol kompleksinin ərazisində Milli Təhlükəsizlik Nazirliyinin əməliyyat qrupu tərəfindən Faiq Fərəcov yaxalanmış və Ədliyyə Nazirliyi Penitensiar Xidmətin əməkdaşlarına təhvil verilib.
