İlham Əliyev Heydər Əliyev Mərkəzində görülən işlərlə tanış oldu

AZXEBER.COM-un məlumatına görə, mərkəzdə həyata keçirilən işlərin hazırkı vəziyyəti barədə dövlətimizin başçısına məlumat verilib. Tikinti işlərinin ən müasir standartlara uyğun şəkildə həyata keçirildiyi bildirilib.Prezident İlham Əliyev Heydər Əliyev Mərkəzində görülən işlərlə yaxından maraqlandı. Azərbaycan Prezidenti inşaat işlərinin aparıldığı ayrı-ayrı sahələri gəzdi, görülən işlərlə yerindəcə tanış olub. İnşaatda istifadə olunan tikinti materialları barədə Prezident İlham Əliyevə məlumat verilib. Dövlət başçısı inşaat materiallarının keyfiyyəti ilə maraqlanıb.Qeyd edək ki, mərkəzin ərazisində yol-nəqliyyat və digər infrastruktur ən müasir standartlara uyğun şəkildə qurulacaq, ərazidə yaşıllıq zolaqları salınacaq. Buraya gələn qonaqların rahat gediş-gəlişini təmin etmək üçün müasir eskalatorlar quraşdırılıb.Xalqımızın ümummilli lideri, ulu öndər Heydər Əliyevin adını daşıyan müasir memarlıq nümunəsi müxtəlif beynəlxalq tədbirlərin, konfransların, müsabiqələrin, festivalların, sərgi, konsert və ziyafətlərin yüksək səviyyədə təşkil olunmasına imkan verəcək.Görülən işlərlə yaxından tanış olan Prezident İlham Əliyev ətraf ərazilərin abadlaşdırılması ilə bağlı da müvafiq tapşırıqlarını verib.