Məktəblərdə mobil telefonlardan istifadəyə qoyulan qadağa şagirdlərin psixi sağlamlığını və dərs göstəricilərini ciddi şəkildə yaxşılaşdırmır.
AZXEBER.COM xəbər verir ki, bu nəticə İngiltərədə aparılan yeni araşdırmada ortaya çıxıb.
Tədqiqat 30 məktəbdə təhsil alan 1227 şagird arasında aparılıb. Araşdırma zamanı telefon istifadəsinin tam qadağan olunduğu məktəblərlə, telefondan müəyyən hallarda istifadə edilməsinə icazə verilən məktəblər müqayisə edilib.
Nəticələr göstərib ki, hər iki məktəb növündə oxuyan şagirdlərin psixi sağlamlığı, narahatlıq və depressiya səviyyəsi, yuxu keyfiyyəti, fiziki aktivliyi, eləcə də ingilis dili və riyaziyyat fənləri üzrə nəticələri arasında ciddi fərq yoxdur.
Həmçinin sinifdə qayda pozuntularının sayında da nəzərəçarpacaq dəyişiklik qeydə alınmayıb.
Araşdırma zamanı məlum olub ki, telefon qadağası olan məktəblərdə şagirdlər dərs günü ərzində mobil telefondan orta hesabla 40 dəqiqə, sosial mediadan isə 30 dəqiqə daha az istifadə edirlər. Ancaq bu məhdudiyyət onların gün ərzində ümumi ekran vaxtını ciddi şəkildə azaltmır. Tədqiqata görə, hər iki qrupda şagirdlər gün ərzində orta hesabla 4-6 saat smartfondan istifadə edirlər.
Araşdırmanın müəllifləri bildirirlər ki, təkcə məktəbdə telefon qadağası tətbiq etmək problemi həll etmir. Onların fikrincə, daha yaxşı nəticə əldə etmək üçün yeniyetmələrin telefon və sosial media istifadəsi yalnız məktəbdə deyil, tamamilə məhdudlaşdırılmalıdır.
Fəridə Əsədzadə
