Xəbər verdiyimiz kimi, Bakı Dövlət Universitetinin (BDU) rektoru Abel Məhərrəmovun Azərbaycan İnternet Forumunun prezidenti, Multimedia Mərkəzinin direktoru Osman Gündüzlə görüşündə ABŞ-Azərbaycan Media İnkişafı Fondu tərəfindən dəstəklənən “Yeni medianın tədrisinin təkmilləşdirilməsi” layihəsi müzakirə edib.
Layihə həmçinin BDU-nun jurnalistika fakültəsində internet televiziya studiyasının yaradılmasını nəzərdə tutur. İnternet TV gələcək jurnalistlərə praktiki vərdişlər əldə etməkdə kömək edəcək.
A.Məhərrəmov layihənin BDU-da həyata keçirilməsini dəstəkləyərək qeyd edib ki, yaradılacaq studiyanın daha müasir standartlara cavab verməsi, maddi-texniki bazanın güclü olması üçün universitet də öz növbəsində maliyyə yardımı etməyə hazırdır.
Məsələ ilə bağlı AZXEBER.COM portalı ilk olaraq Azərbaycan İnernet Formunun (AİF) prezidenti Osman Gündüzün münasibətini öyrənmişdi.
Məsələ ilə bağlı olaraq AZXEBER.COM portalı layihənin təşkilatçılarından olan, BDU-nun jurnalistika fakültəsinin müəllimi Könül Niftəliyevanın fikirlərini öyrənib. Könül xanım bu layihənin universitet tələbələri üçün çox böyük şans olduğunu söyləyib: “Bakı Dövlət Universitetində yaradılacaq internet televiziya və radio studiyasında tələbələrin təcrübə keçmələri üçün hər cür şərait yaradılacaq. Tək BDU-nun yox, həmçinin digər universitetlərin də tələbələri bu studiyadan faydalanacaqlar. Ümumilikdə 11 universitetin tələbələri üçün nəzərdə tutulub. Yəni, BDU-dakı studiya baza rolunu oynayır. Həmin bu 11 ali təhsil müəssisələrində “Yeni media” adlı dərslər tədris olunacaq. Tələbələr öz universitetlərində nəzəriyyə öyrənməkdən əlavə, BDU-da yaradılacaq studiyada təcrübə keçəcəklər. Bunun üçün də universitetlərə domen, modul paylanacaq. Tələbələri isə, təhsil aldıqları universitetin müəllimləri seçəcəklər. Həmçinin, elektron qəzet ilkin olaraq istifadəyə veriləcək. Maliyyə dəstəyi isə, Amerika səfirliyi və universitetin özüdür. Yəni, 50-50-yə. Layihənin hazırlanması 15 yanvarda həyata keçirilib. Amma ayın 20-dən sonra BDU-da 11 universitetin jurnalistika kafedrasının müdirləri, müəllimləri, həmin işlərdə fəallıq göstərə biləcək tələbələr yığışacaq. Məncə, çox müsbət yöndə olan bir layihədir”.
Mövzu davam etdiriləcək...
Sevil Rəsulzadə
