Azərbaycan ilə Böyük Britaniya arasında münasibətlər yeni inkişaf mərhələsinə qədəm qoyub. 12 noyabr 2026-cı ildə Dublin şəhərində Azərbaycan Prezidenti İlham Əliyev və Böyük Britaniya və Şimali İrlandiya Birləşmiş Krallığının Baş naziri Endi Börnhem arasında keçirilən görüş zamanı iki ölkə arasında Strateji Tərəfdaşlıq haqqında Birgə Bəyannamə imzalanıb. Bu sənəd ikitərəfli münasibətlərin daha yüksək səviyyəyə çatdırılmasını rəsmiləşdirərək əməkdaşlığın gələcək istiqamətlərini müəyyənləşdirir.
Azərbaycan-Böyük Britaniya münasibətlərinin əsasını uzun illərdir enerji sahəsindəki əməkdaşlıq təşkil edir. Britaniyanın BP şirkəti Azərbaycanın neft-qaz sektorunda mühüm layihələrin həyata keçirilməsində iştirak edib. Lakin müasir dövrdə tərəfdaşlıq yalnız ənənəvi enerji sahəsi ilə məhdudlaşmır. Təmiz enerji, günəş və külək enerjisi, yaşıl enerji dəhlizləri və karbon emissiyalarının azaldılması yeni əməkdaşlıq istiqamətləri kimi ön plana çıxır.
2026-cı ilin oktyabr ayında Bakıda keçirilən Azərbaycan-Böyük Britaniya Hökumətlərarası Komissiyasının 8-ci iclasında iqtisadiyyat, ticarət, nəqliyyat, enerji və rəqəmsal infrastruktur sahələrində əməkdaşlıq müzakirə olunub. Görüş çərçivəsində 2026–2027-ci illər üzrə 60-dan çox tədbiri əhatə edən Fəaliyyət Planı qəbul edilib.
Böyük Britaniya Azərbaycanın ən mühüm iqtisadi tərəfdaşlarından biridir. İki ölkə arasında qarşılıqlı ticarət əlaqələrinin genişləndirilməsi, qeyri-neft sektoruna investisiyaların cəlb edilməsi və yeni biznes layihələrinin yaradılması əsas prioritetlər sırasındadır.
Bununla yanaşı, Azərbaycanın Orta Dəhliz üzərində yerləşməsi Böyük Britaniya şirkətləri üçün nəqliyyat və logistika sahəsində yeni imkanlar yaradır. Xüsusilə, beynəlxalq yükdaşımaların artırılması və Avropa ilə Asiya arasında iqtisadi əlaqələrin gücləndirilməsi baxımından bu əməkdaşlıq mühüm əhəmiyyət daşıyır.
Strateji tərəfdaşlığın yeni mərhələsində süni intellekt, kibertəhlükəsizlik, rəqəmsal texnologiyalar və insan kapitalının inkişafı da xüsusi diqqət mərkəzindədir. İki ölkə universitetləri və elmi müəssisələri arasında əməkdaşlığın genişləndirilməsi, birgə təhsil proqramlarının yaradılması və mütəxəssis mübadiləsinin təşviqi gələcək inkişaf üçün mühüm perspektivlər açır.
Onu da qeyd edək ki, Azərbaycan və Böyük Britaniya arasında Strateji Tərəfdaşlıq haqqında Birgə Bəyannamənin imzalanması yalnız diplomatik hadisə deyil, həm də gələcək əməkdaşlığın istiqamətini müəyyən edən mühüm siyasi addımdır. Sənəddə müdafiə və təhlükəsizlik, iqtisadi inkişaf, ticarət, təhsil və innovasiya sahələri əsas əməkdaşlıq istiqamətləri kimi müəyyənləşdirilib. Tərəflər strateji tərəfdaşlığın inkişafını mütəmadi qiymətləndirmək üçün illik görüşlərin keçirilməsini də nəzərdə tutmuşdur.
Beləliklə, Azərbaycan-Böyük Britaniya münasibətləri ənənəvi əməkdaşlıq modelindən daha geniş və çoxşaxəli tərəfdaşlıq modelinə doğru inkişaf edir. Odur ki, qarşılıqlı siyasi etimad, iqtisadi maraqlar və yeni texnologiyalar sahəsində əməkdaşlıq iki ölkə arasında əlaqələrin gələcəkdə daha da möhkəmlənəcəyinin təminatıdır.
Vilayət İsmayılov, iqtisad elmləri doktoru, professor











































