İran, İsrailin milli kəşfiyyat xidməti MOSSAD üçün casusluq etdiyi ittihamı ilə mühakimə olunan bir şəxsi edam edib.
AZXEBER.COM Türkiyə mətbuatına istinadən xəbər verir ki, bu barədə İran mediası məlumat yayıb.
Məlumata görə, MOSSAD üçün casusluq etmək və milli təhlükəsizliyə zərər vurmaq ittihamları ilə saxlanılan İran vətəndaşı Məhəmməd Əmin Mehdavi Şayəstə barəsində çıxarılan edam hökmü İran Ali Məhkəməsi tərəfindən təsdiqlənib. Hökmün təsdiqlənməsindən sonra Mehdavi bu gün səhər edam olunub.
Xəbərlərdə qeyd olunub ki, Şayəstə həbs edilməzdən əvvəl MOSSAD zabitlərinin göstərişi ilə sosial media və mesajlaşma tətbiqləri vasitəsilə İran Silahlı Qüvvələri personalına qarşı psixoloji və informasiya əməliyyatları aparıb. Həmçinin onun təhlükəsiz rabitə, məxfilik və anonimlik sahələrində təlim keçdiyi və əldə etdiyi məlumatları kiber şəbəkədəki digər üzvlərlə paylaşdığı bildirilib.
Digər tərəfdən, Şayəstənin təlim və koordinasiya məqsədilə qonşu ölkələrdən birinə getdiyi, orada miqrasiya şirkəti adı altında fəaliyyət göstərdiyi və bu ölkədə MOSSAD-a bağlı iki zabitlə dəfələrlə görüşərək virtual əməliyyatları idarə etdiyi qeyd olunub.
Oksana
