Turxan ƏliquliyevSon zamanlar Rüstəm İbrahimbəyov müxalifətin vahid namizədi kimi gündəmdədir.
Buna baxmayaraq İsa Qəmbər hələ namizədliyini geri götürməyib. Bilmirəm, “2” rəqəmi nə vaxtdan vahid hesab olunur, yəqin, bu da müxalifətin yeni kəşflərindəndir.
Ortaya dəqiq olaraq bir namizəd çıxara bilməyən müxalifətin vahid namizəd adlandırdığı Rüstəm İbrahimbəyov isə indidən prezidentlik üçün vədlər verib. Unudub ki, onun prezidentliyə namizədliyini verməsi qanuna ziddir. Qeyd edim ki, Rüstəm bəy son 10 ildə Azərbaycanda yaşamayıb, qeyri-leqal olaraq ikili vətəndaşlığı var ki, bu həm Rusiya qanunlarına, həm də Azərbaycan qanunvericiliyinə ziddir. Prezidentliyə namizədin başqa ölkə qarşısında öhdəliyi olmamalıydı və vətəndaşlıqdan imtina prosedurunun uzun çəkə biləcəyi ehtimal olunurdu. Belə də oldu, seçkilərə 4 ay qalmış Rüstəm bəyin Rusiya vətəndaşlığından imtina etməsi üçün 6 ay lazım oldu.
Elə isə maraqlı bir sual yaranır, necə oldu ki, Milli Şura namizəd seçimində belə səhlənkarlığa yol verdi? Buradan belə nəticə çıxır ki, Milli Şurada təmsil olunan İsa Qəmbər Milli Şuraya bir növ kələk gəldi. Çünki uzun illərin siyasətçisi ola bilməz ki, Rüstəm İbrahimbəyovun prezidentliyə namizədliyini verməsinin qanundankənar olduğunu bilməsin. O, sadəcə, sakit duraraq aranın qarışmağını gözlədi və məqsədinə çatdı. Digərlərinin prezidentliyə namizədliyini irəli sürməyəcəyi halda İsa bəy vahid namizəd olaraq seçkilərə gedə bilər. Nəzərə alsaq ki, müxalifətin vahid anlayışı 2-dir, heç şübhəsiz vahid 3-ə də qalxa bilər, 4-ə də. Yəni Milli Şura müxalifətin seçki öncəsi “yalançı” birliyidir.
Rüstəm İbrahimbəyov “skype” vasitəsi ilə 2 illik prezidentlik müddətində həyata keçirəcəyi islahatlardan, verdiyi vədlərdən danışıb. Gəlin tanış olaq:
- Milli Məclis buraxılır və azad seçkilərlə xalqı təmsil edən yeni parlament seçilir.
- Ölkədə prezidentlik ləğv olunur və Avropada olduğu kimi parlament idarəsinə keçilir, yəni parlament cümhuriyyəti qurulur.
- İcra Hakimiyyətlərinin səlahiyyətlərinin əsas hissəsi azad seçki yolu ilə seçilən bələdiyyələrə verilir.
- Bütün siyasi partiya və təşkilatlar üçün bərabər mübarizə şəraiti yaradılır.
- Bütün nazirlik və hökumətin əsas vəzifələri, əsasən xarici təhsilli, savadlı, geniş dünya görüşlü və ən əsası xalqın mənafeyini hər şeydən üstün tutan gənc kadrlara verilir.
- Ölkənin bütün sahələrində köklü islahatlar aparılır. Rüşvətə tam bulaşmış nazirlik idarələr ləğv edilir və ya struktur dəyişikliyi aparılır. Yerdə qalan idarələrdə isə rüşvətə bulaşmış kadrlar yeniləri ilə əvəzlənir.
- Və ən əsası insanların ləyaqəti özlərinə qaytarılır. Heç kimin başqasının haqqını tapdalamağına icazə verilmir. Vəzifəsindən və pulundan asılı olmayaraq hər bir vətəndaşın bərabər hüquqları təmin edilir.
Çox maraqlıdır, Rüstəm bəy bu qədər vədi hansı dildə verib? Azərbaycan dilini bilməyən bir namizəd əvvəlcə öz dilini öyrənsə, yaxşı olar. Bundan əlavə, Rüstəm bəy vəd verib ki, dövlət strukturlarında əsas vəzifələri xaricdə təhsil alanlara verəcək, yəni Azərbaycan universitetlərində təhsil alan və ya məzun olan gənclər işsiz qalacaq. Yəqin xoş niyyətlə bir cümlə işlədib, lakin rus dilindən öz dilimizə tərcümə edənlər cümləni yaxşı anlamayıb. Bu halda bir deyim yadıma düşür, “Avazınız yaxşı gəlir amma heyif ki, oxuduğun Quran deyil”.
Ümumiyyətlə Milli Şuranı təmsil edənlərin keçmişinə nəzər salsaq, bir zamanlar hakimiyyətin yanında olan, hakimiyyəti tərifləyən, lakin tutduqları vəzifədən azad edildikdən sonra hakimiyyətə qarşı çıxan insanların toplandığı bir yer olduğunu açıq aşkar görmək mümkündür. Hətta hakimiyyəti gözdən salmaq üçün böhtan və yalanlarla dolu çıxışlar da həmin insanlara yad deyil. Misal üçün Gültəkin Hacıbəylini göstərə bilərik. 9 yaşlı övladının məhkəmə qərarı ilə onun əlindən alınaraq atasına verildiyi xəbərini elə mükəmməlliklə mətbuata sızdırdı ki, hətta KİV-lər də bu yalana inanaraq məsələni ictimailəşdirdi. Lakin sonradan məlum oldu ki, məhkəmə həftənin bəzi günlərində uşağın atası ilə görüşməyinə icazə verib. Öz övladını şəxsi mənafeyi uğrunda istifadə edən bir insandan hər cür pislik gözləmək olar. Onu da qeyd etmək istərdim ki, Azərbaycan təcrübə məkanı deyil.
