Türkiyənin İstanbul şəhərində Türkiyə Gənclər Birliyi və Azərbaycan İslahatçı Gənclər Birliyi arasında qarşılıqlı əməkdaşlıq və əlaqələrin gücləndirilməsi məqsədilə "Qardaşlıq və Əməkdaşlıq" memorandumu imzalanıb.

AZXEBER.COM xəbər verir ki, gənclər birliklərinin birgə təşəbbüsü əsasında təşkil olunan Vətən müharibəsinə aid fotoşəkillərdən ibarət stendlərə baxış keçirilib, Azərbaycanın haqq davasında Türkiyənin ölkəmizə siyasi və diplomatik dəstəyinin əhəmiyyətindən bəhs edilib.

Daha sonra tədbirin rəsmi hissəsinə keçid edilərək, Anlaşma Memorandumu imzalanıb. Anlaşmanı İslahatçı Gənclər Birliyinin sədri Fərid Şahbazlı və Türkiyə Gənclər Birliyinin başqanı Dilək Çınar imzalayıb. 

Tədbirdə Azərbaycandakı İstanbuldakı Baş Konsulluğunun konsulu Zaur Allahverdi-zadə, QHT və media nümayəndələri iştirak edib.

Azərbaycan İslahatçı Gənclər Birliyinin sədri Fərid Şahbazlı bildirib ki, bu memorandum və təşkil olunan fotosərgi bütün türk dünyası gəncləri üçün vacibdir.

O, bundan sonra iki ölkə arasında gənclərin mübadiləsi, elmi-sosial fəaliyyətlərinin genişləndirilməsi istiqamətində atılacaq addımlardan danışıb: "Birgə tərəfdaşlığımızın gücləndirilməsi istiqamətində təşkil olunacaq qarşılıqlı mübadilə proqramlarından başqa digər məqsədimiz isə Ermənistan tərəfindən Azərbaycanın mülki əhalisinə qarşı həyata keçirilən terror hücumları ilə Türkiyə gənclərini tanış etmək, habelə Ali Baş Komandanın rəhbərliyi altında Qarabağ zəfərindən sonra görülən abadlıq-quruculuq işlərini gənclərə çatdırmaq idi. Bu gün tədbirdə Türkiyə universitetlərindən olan fəal gənclər iştirak etdilər. Ümid edirik ki, Türkiyənin ən köklü təşkilatlarından olan Gənclər Birliyi ilə əməkdaşlığımız bundan sonra daha da güclənəcək".