Bu gün İsmayıllı rayonunda etiraz aksiyasının növbəti dalğası başlayıb.
ANS PRESS-in bölgə müxbirinin verdiyi məlumata görə, bu dəqiqələrdə yüzlərlə rayon sakini Babək prospekti, Park yolu və Mirzə Fətəli Axundov küçələri ilə İcra Hakimiyyətinin binasına doğru yürüş edirlər. Onların əllərində daş parçaları və dəyənəklər var. Polis və təhlükəsizlik qüvvələri yürüşün qarşısını almaq üçün müqavimət göstərir. Ancaq etirazçı kütlə daşları polisə atır. Polis səs bombaları və gözyaşardıcı qazdan, rezin güllələrdən istifadə edir. Şəhərdə qaz bombalarından qalan qazın iyi açıq-aydın hiss olunur. İlkin məlumatlara görə, hazırda 2 nəfər həbs edilib. ** İsmayıllıda icra hakimiyyətinin binası qarşısında sakinlər maşınlarla polisə hücum edib. "AzadlıqRadiosu"nun müxbiri xəbər verir ki, 7-8 maşınla polisə hücum olub. Polis gözyaşardıcı qazdan, su şırnaqlarından istifadə etməklə onların qarşısını ala bilib. Gözyaşardıcı qaz ətrafa yayıldığından nəfəs almaq mümkün deyil.
