Müraciətdə ingilis dili kursunun vaxtının uzadılması xahiş olunur
“Azercell Telekom” MMC-nin jurnalistlər üçün “Kaspi” Təhsil Mərkəzində təşkil etdiyi ingilis dili kursunun 20 yaxın iştirakçısı kursun vaxtının uzadılması ilə bağlı şirkətin prezidentinə müraciət ediblər.
Müraciətidə deyilir: “Biz 2012-ci ilin oktyabr ayından “Azərcell Telekom”un jurnalistlər üçün “Kaspi” Təhsil Mərkəzində təşkil etdiyi ingilis dili kurslarının aktiv işirakçısıyıq. Ötən 6 ay ərzində kursda çox fəal iştikak etmişik və ingilis dilində danışıq imkanlarımızı xeyli təkmilləşdirmişik. Kursun sonunda imtahan verərək, bir üst səviyyəyə keçmişik. Amma təəssüf ki, aprel ayının 15-də kurs başa çatıb və növbəti kursun oktyabrın 15-də başlaması planlaşdırılır.
Biz hesab edirik ki, 6 aylıq fasilə, dil öyrənənlər üçün həddən artıq çoxdur. Bu fasilə mənimsənilmiş biliklərin bir hissəsinin unudulmasına səbəb ola bilər. Halbuki “Kaspi” Təhsil Mərkəzində təşkil etdiyiniz ingilis dili kursları bizim üçün faydalıdır və buna görə də təhsilimizi davam etdirmək istəyirik. Sizdən xahiş edirik, bizim kursun vaxtının bu ilin iyun ayının 15-ə kimi uzadılmasına və kursda öyrəndiklərimizi təkrarlamaq üçün iyul ayında 10 günlük yay məktəbinin təşkilinə dəstək verəsiniz”.
