APA-nın cənub bürosunun xəbərinə görə, nazir hadisə yerində jurnalistlərə açıqlamasında ehtimallara görə, hadisənin texnogen səbəblərdən baş verdiyini bildirib: “Tam təfərrüatlar ərazidə təmizləmə işləri tam başa çatandan sonra bilinəcək”.
K. Heydərov hadisə nəticəsində ölənlərin və xəsarət alanların ailələrinə yardım edilməsinin gündəmdə olduğunu açıqlayıb.
APA-nın cənub bürosu xəbər verir ki, Daxili İşlər, Milli Təhlükəsizlik nazirliklərinin, Baş Prokurorluğun əməkdaşları hadisə yerində birgə araşdırma aparırlar. Hadisə yerində süxurlardan nümunələr götürülüb.
Masallı Rayon Pokurorluğundan “Trend”ə verilən məlumata görə, faktla bağlı rayon prokurorluğunda Cinayət Məcəlləsinin ehtiyatsızlıqdan iki və ya daha çox adamı öldürmə (124.2-ci) maddəsi ilə cinayət işi açılıb. Hadisənin baş vermə səbəblərini müəyyənləşdirmək üçün işçi qrup yaradılıb.
Fevralın 7-də günorta saatlarında Masallı Rayon Telekommunikasiya Qovşağı binasının divarlarının çökməsi nəticəsində binanın bir hissəsi dağılıb və iki nəfər həlak olub, dörd nəfər yaralanıb.
Həlak olanlar qovşağın texniki şöbəsinin rəisi, 1987-ci il təvəllüdlü Asim Əliyev və qovşağın əməkdaşı, 1964-cü il təvəllüdlü Kişvər Şahverdiyevadır.
Hadisə zamanı İbadət Quliyev, Ziyafət Məmmədov, İlkin İbişov, Natiq Məmmədov xəsarət alıblar. Yaralılar Masallı Mərkəzi Rayon Xəstəxanasına yerləşdiriliblər.
