Kafelərdə saatlarla vaxt keçirmək qadağan edilə bilər - AÇIQLAMA

SOSİAL

21:56 01.06.2026

666

Türkiyədə kafelərdə və xüsusilə kofeşoplarında içki alıb uzun müddət oturan və işləyən şəxslərlə bağlı yeni məhdudiyyətlər gündəmə gəlib. Bu yanaşma xidmət sektorunda yeni müzakirələr yaradıb. Bizdə də oxşar qaydaların tətbiqi mümkündürmü sualı aktuallaşır. Məsələ həm müştəri məmnuniyyəti, həm də biznes maraqları baxımından diqqət çəkir.

Mövzu ilə bağlı hüquqşünas Rəhim Xoyski Demokrat.az-a bildirib ki, Azərbaycan qanunvericiliyində müştərilərin kafelərdə və ya kofeşoplarda konkret oturma müddəti ilə bağlı hər hansı ümumi dövlət qadağası və ya limit mövcud deyil:

"Azərbaycan Respublikası Nazirlər Kabinetinin 2014-cü il 3 aprel tarixli 94 nömrəli Qərarı ilə təsdiq edilmiş "Azərbaycan Respublikasında ticarət, ictimai iaşə, məişət və digər növ xidmət Qaydaları"na əsasən, ictimai iaşə obyektləri (kafelər, restoranlar) öz iş rejimini və xidmət formalarını müəyyən etməkdə sərbəstdirlər. Bu o deməkdir ki, sahibkar öz obyektində "daxili qaydalar" tətbiq edə bilər (məsələn: pik saatlarda masadan istifadə müddəti, "no laptop" (noutbuk qadağası) zonaları və s.). Azərbaycan Respublikasının Mülki Məcəlləsinin 408-ci maddəsinə görə, iaşə xidməti "ictimai müqavilə" hesab olunur. Sahibkar xidmət göstərməkdən əsassız imtina edə bilməz. Lakin, əgər müəssisə öncədən (məsələn, masanın üzərindəki məlumat lövhəsində və ya girişdə) müəyyən zaman limitini və ya xüsusi qaydanı (məsələn, "noutbukla işləmək üçün masadan istifadə müddəti 1 saatdır") qeyd edibsə, istehlakçı həmin obyektdən xidmət almaqla bu şərtləri qəbul etmiş sayılır".

O bildirib ki, qanun istehlakçıların bərabər xidmət almasını tələb edir:

"Əgər bir müştərinin uzun müddət (məsələn, 5-6 saat) masanı məşğul etməsi digər istehlakçıların xidmət almasına mane olursa, sahibkar kommersiya maraqlarını və xidmət dövriyyəsini qorumaq üçün ağlabatan məhdudiyyətlər tətbiq edə bilər.

Xülasə, dövlət tərəfindən qoyulmuş rəsmi qadağa yoxdur, sahibkarların özəl mülkiyyəti olan iaşə obyektlərində masadan istifadə ilə bağlı daxili qaydalar və vaxt limiti tətbiq etmək hüququ var, bir şərtlə ki, bu barədə müştəri əvvəlcədən (xidməti sifariş etməzdən əvvəl) məlumatlandırılsın", - deyə hüquqşünas qeyd edib.