Kambocanın Tailandla həmsərhəd olan Oddar Meançey əyalətində ölkələr arasında sərhəd münaqişəsinin kəskinləşməsi fonunda 30 minə yaxın insan evlərini tərk edib.
Bu barədə "Khmer Times" qəzeti yerli hakimiyyət orqanlarına istinadən məlumat yayıb.
"Məcburi köçkünlərin sayı artıq 8 000 ailəni ötüb, demək olar, 30 000 nəfərə bərabərdir. Rəqəmlər əvvəlki günlə müqayisədə xeyli artıb. Bu, münaqişə nəticəsində humanitar vəziyyətin pisləşdiyini göstərir”, - məlumatda bildirilir.
Daha əvvəl BMT Baş katibinin mətbuat katibinin müavini Stefani Trembley ölkələr arasında eskalasiyanı şərh edərək bildirmişdi ki, Tailandda 131 mindən çox, Kambocada isə 4 mindən çox insan evlərini tərk edib.
Qeyd edək ki, Tailand və Kamboca arasında sərhəd münaqişəsinin eskalasiyası iyulun 24-də səhər saatlarında silahlı fazaya keçib. Sərhəd zonasında atışmalardan sonra tərəflər bir-birini artilleriya atəşinə tutub.
Sərhəd xəttində Tailand və Kamboca qoşunları arasında döyüşlər cümə günü ağır artilleriya, təyyarə və tankların istifadəsi ilə davam edib. Lakin şənbə günü axşam saatlarında məlum olub ki, güclü yağış səbəbindən tərəflər hərbi əməliyyatları dayandırıblar. ABŞ Prezidenti Donald Tramp da öz növbəsində hər iki ölkənin baş nazirləri ilə danışıqlardan sonra sosial şəbəkədə yazıb ki, həm Kamboca, həm də Tailand atəşkəsin tezliklə əldə olunmasında maraqlıdır.
//Rrport
