Ziya Məmmədov: “Paytaxta gətirilən yeni taksilər köhnələri sıradan çıxarmayacaq”
“Bakıya gətirilən yeni London taksiləri köhnə taksiləri sıradan çıxarmayacaq”. Bunu jurnalistlərə açıqlamasında nəqliyyat naziri Ziya Məmmədov bildirib. Lakin eyni zamanda o qeyd edib ki, nazirlik qeyri-qanuni fəaliyyət göstərən taksilərin fəaliyyətini tənzimləyəcək.
Z. Məmmədov deyir ki, Nəqliyyat Nazirliyi Daxili İşlər Nazirliyi və Yol Polisi ilə birgə şəhərdə tıxacların yaranmaması istiqamətində tədbirlər həyata keçirir.
Qeyd edək ki, Nəqliyyat Nazirliyinin elan etdiyi "Bakıda taksi parkının London Taxi TX4 markalı avtomaşınlara dəyişdirilməsi" proqramı çərçivəsində yeni "Baku Taxi Company" şirkəti yaradılıb. “Manganese Bronze Holdings PLC” və Çinin avtomobil istehsalçısı “Geely Automobile Holdings Limited”in birgə müəssisəsi olan “Shanghai LTI” şirkətinin bu taksilərinin 2011-ci ildə Bakıya tədarükü üzrə saziş London şirkəti üçün ən böyük müqavilədir. Sifarişin ümumi dəyəri 27 milyon dollara yaxındır.
Hazırda Bakının küçələrində 300 ədəd bənövşəyi rəngli London “Taxi TX4” avtomobilləri xidmət göstərir. Bakıya ümumilikdə üç minədək yeni taksinin gətirilməsi planlaşdırlır.
