Kimlərə övladlığa uşaq verilmir? - Açıqlama
SOSİAL
00:31 22.07.2026
858
Azərbaycanda qüvvədə olan qanunvericiliyə əsasən, kimlər uşaq övladlığa götürə bilər? Hansı hallarda şəxsin övladlığa götürməsinə icazə verilmir?
"Azərbaycan uşaqları" İctimai Birliyinin sədri Kəmalə Ağazadə demokrat.az-a açıqlamasında bildirib ki, Azərbaycanda övladlığa verilə biləcək uşaqlar, ümumiyyətlə, valideyn himayəsindən məhrum olmuş 0-18 yaş aralığındakı uşaqlardır:
"Övladlığa götürmə qəyyumluqdan fərqlənir. Bu zaman uşağa övladlığa götürən şəxsin ad və soyadı verilir, onunla bağlı mülkiyyət və vərəsəlik hüquqları formalaşır. Bu gün əsas məqamlardan biri odur ki, övladlığa götürülən uşaqlar arasında daha çox 3 yaşa qədər olanlara üstünlük verilir. Bizə də bu barədə müraciətlər olur və izah edirik ki, yalnız 3 yaşa qədər uşaqları seçmək düzgün yanaşma deyil. Axı 3 yaşdan yuxarı uşaqların da sevgiyə və ailəyə ehtiyacı var. Adətən narahatlıq ondan ibarət olur ki, gələcəkdə uşaq onun bioloji övlad olmadığını biləcək. Amma onsuz da nə vaxtsa bunu öyrənəcək. Uşağı aldatmaq doğru deyil. Əgər bu fakt uzun müddət gizlədilərsə və uşaq sonradan övladlığa götürüldüyünü öyrənərsə, bu, daha ciddi psixoloji fəsadlara səbəb ola bilər. Bu baxımdan, insanların daha çox 3 yaşa qədər uşaqlara üstünlük verdiyini görürük”.
Kəmalə Ağazadə əlavə edib ki, bununla yanaşı, bizim təcrübəmizdə sığınacaqda reabilitasiya keçmiş 7-8 yaşlı uşaqların da övladlığa verildiyi hallar olub:
"Kimlər uşağı övladlığa götürə bilməz? Ağır dərəcədə sağlamlıq məhdudiyyəti olan şəxslərə uşaq verilmir. Bildiyim qədər, qanunvericilikdə artıq I qrup əlilliyi olan şəxslərin də övladlığa uşaq götürməsi mümkündür. Lakin onların fiziki vəziyyəti ayrıca qiymətləndirilir. Həmçinin uşaqlara qarşı işgəncə, pedofiliya, zorakılıq və digər bu kimi ağır cinayətlərə görə məhkum olunmuş, cəzaçəkmə müəssisəsində cəza çəkmiş şəxslərə də qanunvericiliyə uyğun olaraq uşaq övladlığa verilmir”.
OXŞAR XƏBƏRLƏR
ƏN SON XƏBƏRLƏR
