Abşeron rayonunun Masazır kəndi ilə metronun "Memar Əcəmi” stansiyasını əlaqələndirən 525 nömrəli müntəzəm marşrutun fəaliyyəti təkmilləşdirilir.
AZXEBER.COM xəbər verir ki, dəyişikliklər iyulun 18-dən qüvvəyə minəcək. Məqsəd "Zəngilan şəhərciyi” yaşayış kompleksi sakinlərinin səfər müddətini azaltmaq, həmçinin "Yeni Bakı” və "Qurtuluş-93” yaşayış komplekslərinin sakinlərinin marşrut istiqamətinin müəyyən edilməsində yaranan çətinlikləri aradan qaldırmaqdır.
Bununla əlaqədar 525 nömrəli marşrut 525A və 525B olmaqla iki istiqamət üzrə fəaliyyət göstərəcək.
Marşrutlar üzrə sərnişinlərə CNG texnologiyası ilə təchiz edilmiş 28 ədəd "King Long” markalı avtobus xidmət göstərəcək. Avtobuslarda ödəniş nağdsız qaydada həyata keçiriləcək.
525A nömrəli marşrut Masazır kəndindəki "Yeni Bakı” yaşayış kompleksindən başlayaraq metronun "Memar Əcəmi” stansiyasına qədər hərəkət edəcək. Avtobuslar 6-7 dəqiqə intervalla fəaliyyət göstərəcək. Gedişhaqqı 0,60 manat olacaq.
525B nömrəli marşrut isə "Zəngilan şəhərciyi” yaşayış kompleksindən başlayaraq "Memar Əcəmi” stansiyasına qədər hərəkət edəcək. Bu istiqamət üzrə avtobuslar 10 dəqiqə intervalla işləyəcək. Gedişhaqqı 0,60 manat müəyyən edilib.
Bundan əlavə, Masazır kəndi daxilində "Yeni Bakı” yaşayış kompleksindən "Zəngilan şəhərciyi” yaşayış kompleksi istiqamətində sərnişindaşımanın təmin edilməsi məqsədilə 524 nömrəli marşrut da fəaliyyət göstərəcək. Bu marşrut üzrə gedişhaqqı 0,50 manat təşkil edəcək.
