Keçmiş sovet ölkələri arasında ən yüksək internet qiymətləri Türkmənistandadır. Bu ölkədə internet xidmətlərini yalnız bir şirkət - “Türkmen Telekom” həyata keçirir. Keçmiş sovet ölkələri arasında ən yüksək internet qiymətləri Türkmənistandadır. Bu ölkədə internet xidmətlərini yalnız bir şirkət - “Türkmen Telekom” həyata keçirir. 1 mb/s sürətlə limitsiz internetə qoşulmaq üçün dövlət şirkəti olan “Türkmen Telekom”a ayda nə az - nə çox, düz 2600 manat (9700 türkmən manatı) ödəmək lazımdır. Yeri gəlmişkən qeyd edək ki, Türkmənistanda ilk “internet kafe” 4 il bundan əvvəl - 2007-ci ildə açılıb. Oxucularımız üçün maraqlı olacağını nəzərə alaraq, Müstəqil Dövlətlər Birliyinə (MDB) daxil olan digər ölkələrdəki mövcud internet qiymətlərini də araşdırdıq. İnternet xidmətlərinin bahalığına görə ikinci sırada dayanan Belarusda qiymətlər Türkmənistanla müqayisədə təxminən 3 dəfə ucuzdur. Belarusun “TCM” şirkətinə 1 mb/s sürətli limitsiz internet xidmətləri üçün ayda 970 manat (65 000 rubl) ödəmək lazımdır. Tacikistanın “Tacik Telekom” şirkəti 1 mb/s sürətli limitsiz internet üçün ayda 800 manat (5000 somoni), Qırğızıstanın “Kırqız Telekom” şirkəti isə 256 kb/s sürətli limitsiz internet üçün ayda 340 manat (20 000 som) tələb edir. Qeyd edək ki, Qırğızıstanda əhaliyə təqdim olunan internetin sürəti 1 mb/s-dən aşağıdır. Qırğızıstan kimi Özbəkistanda da əhali 1 mb/s sürətli internetdən istifadə etmir. Özbəkistanın “Albatros” şirkəti tərəfindən təklif olunan 256 kb/s sürətli limitsiz internet xidmətinin aylıq haqqı 200 manata (450 000 som) bərabərdir. İnternet qiymətlərinə görə yalnız Rusiya, Ukrayna və Moldovadan geri qalırıqMDB-yə daxil olan digər ölkələrə gəldikdə isə bu dövlətlərdə internetin qiyməti daha ucuzdur. Ən ucuz internet Ukraynada təklif olunur. Bu ölkədə fəaliyyət göstərən “Beeline” şirkətinə 2 mb/s sürətli limitsiz internet üçün ayda cəmi 6 manat (55 qrvin) ödəmək lazımdır. Bundan başqa, Moldovanın “Nordlines” şirkəti 1 mb/s sürətli limitsiz internet üçün ayda 10 manat (150 ley), Qazaxıstanın “KaP-Tel” şirkəti eyni göstəriciyə malik internet üçün ayda 20 manat (3600 tengə), Gürcüstanın “Beeline” şirkəti 1 mb/s sürətli limitsiz internet üçün ayda 16 manat (35 lari), Ermənistanda fəaliyyət göstərən eyni adlı şirkət isə 1 mb/s sürətli limitsiz internet üçün ayda 26 manat (12000 dram) tələb edir. MDB ölkələri arasında ən ucuz internet Rusiyadadır. Şimal qonşumuzun aparıcı şirkətlərindən olan “Beeline” şirkətinin təqdim etdiyi 12 mb/s sürətli limitsiz internet xidməti üçün ayda 12 manat (450 rubl) ödəmək lazımdır. Azərbaycan internet qiymətlərinin ucuzluğuna görə MDB-də yalnız Rusiya, Ukrayna və Moldovadan geri qalır. Ölkəmizdə fəaliyyət göstərən “Ultel” şirkəti 1 mb/s sürətli limitsiz internet üçün ayda 15 manat tələb edir. Onu da qeyd edək ki, son 2-3 il ərzində ölkəmizdə internet qiymətləri 10 dəfədən çox aşağı salınıb. Belə ki, 2008-ci ildə insanlar 1 mb/s sürətlə internetə qoşulmaq üçün ayda 300-400 manat ödəməli olurdular. Yaponiyada internet “bizim pulla havayıdır” Məlumat üçün bildirək ki, dünyada ən ucuz internet xidmətləri Yaponiyada təklif olunur. Bu ölkədə internet xidmətlərinə görə çox cüzi ödənişlər edilir. Yaponiyada sürəti 61 mb/s olan limitsiz internet xidmətlərinə görə aylıq ödəniş təxminən, 20 qəpik (25-30 sent) təşkil edir. Cənubi Koreyada isə 45 mb/s sürətli internetin aylıq qiyməti 35 qəpiyə (45 sent) bərabərdir. Yaponiya və Cənubi Koreya ilə bərabər, Avropanın inkişaf etmiş ölkələrində, o cümlədən də ABŞ və Kanada da internet qiymətləri olduqca aşağıdır. Bu ölkələrdə təkcə qiymətlər ucuz deyil, eyni zamanda yüksək sürətli internet xidmətləri təqdim olunur. Artıq inkişaf etmiş ölkələrdə MDB-də yüksək göstərici hesab olunan 4-5 mb/s sürətlə internet xidmətləri göstərilmir.
/// Zaman qəzeti, zaman.az
