Yəmən hökumətinin Bab əl-Məndəb boğazına nəzarəti bərpa etməsi ilə bağlı xəbərlər ehtiyatlı nikbinliyə əsas verir, lakin Yaxın Şərqdə münaqişənin həllindən danışmaq hələ tezdir.
Bunu Almaniya kansleri Fridrix Merz Litvanın Baş naziri Mindauqas Sinkeviçyusla birgə mətbuat konfransında bildirib.
Merz Almaniyanın mümkün olan bütün səviyyələrdə Yaxın Şərqdə münaqişənin başa çatmasına və ticarət yollarının təhlükəsizliyinin təmin olunmasına töhfə verməyə çalışdığını deyib.
Onun sözlərinə görə, Yəmənlə bağlı son xəbərlər ehtiyatlı nikbinlik üçün əsas yaratsa da, bununla kifayətlənmək olmaz. Kansler Hörmüz boğazının daimi əsasda yenidən açılmasının və orada hər hansı rüsumun tətbiq edilməməsinin vacibliyini vurğulayıb. O, problemin həllindən hələ uzaq olduqlarını bildirib.
Merz qeyd edib ki, ötən həftənin cümə günü "Yeddilik qrupu” çərçivəsində ABŞ Prezidenti Donald Trampla videokonfrans keçirib və Yaxın Şərqdəki vəziyyət də müzakirə olunan məsələlər arasında olub.
Almaniya kanslerinin sözlərinə görə, Avropa səviyyəsində də münaqişənin başa çatdırılması istiqamətində səylər göstərilir. O bildirib ki, Almaniya hökuməti, o cümlədən xarici işlər və müdafiə nazirləri münaqişənin mümkün qədər tez başa çatması üçün çalışırlar.
Merz münaqişənin nəticələrinin enerji qiymətlərində də ciddi şəkildə hiss olunduğunu əlavə edib.
///apa.az///
