Ötən gün Belarusa Ali məhkəməsi Minsk metro stansiyasında böyük partlayış həyata keçirmiş 2 şəxs barədə ölüm cəzası qərarı verib. Xatırladaq ki, cari ilin aprel ayının 11-də baş vermiş terror aksiyasında 15 nəfər ölmüş, yüzlərlə insan orta və ağır tipli xəsarət almışdı. 25 yaşlı Dmitri Konovalov partlayışı həyata keçirməkdə, həmyaşıdı Vladislav Kovalyov “törədilmiş terrorda əlbirlikdə” günahkar bilinib. Ölüm cəzası vermiş hakim təqsirli şəxslərin cəmiyyətə müstəsna təhlükə yaratdığını və onların ən sərt şəkildə cəzalandırılmalı olduqlarını qeyd edib. Artıq bir sıra hüquq müdafiəçiləri ölüm cəzası qərarının geri götürülməsi üçün ölkə prezidenti Aleksandr Lukaşenko qarşısında vəsatət qaldırıb. Yazılı müraciətdə cinayət işinin ətraflı şəkildə araşdırılmadığı və müttəhimlərin günahını sübut edən tutarlı dəlillərin olmaması bildirilir. Konovalov günahını etiraf etsə də, Kovalyov məhkəmə ifadəsindən öncə, sorğu-sual zamanı Dmitrinin döyüldüyünü iddia edir. Qeyd edək ki, müdafiə tərəfinin işi apelyasiya məhkəməsinə vermək hüququ olmadığından, məhkəmə qərarı qüvvəyə minmək üçün prezidentin təsdiqini gözləyir. Prezident Lukaşenko günün əvvəlində verdiyi bəyanatda partlayışı həyata keçirmiş şəxslərin qanunla icazə verilən ən sərt şəkildə cəzalandırılmalı olduğunu nəzərə çatdırıb.Ölüm cəzası verilmiş, Dmitri Konovalov və Vladislav Kovalyov uşaq yaşlarından dostluq edir. Onlar partlayış gününə kimi birlikdə Vitebsk şəhər zavodunda işləyiblər. Məhkəmə araşdırmalarından sonra partlayışların siyasi xarakter daşımadığı ortaya çıxıb. Araşdırmalar nəticəsində o da məlum olub ki, təqsirləndirilən şəxslər “insanlığa qarşı olan nifrətdən” dolayı dəhşətli partlayışı törətməyi qərara alıb. Prezidentin qərarı təsdiqləyəcəyi təqdirdə təqsirləndirilən şəxsləri güllələnmə gözləyir
