“...Biz öz milli mənəvi dəyərlərimizi, adət-ənənələrimizi, əxlaqi dəyərlərimizi bütün istiqamətlərdə qorumalıyıq, saxlamalıyıq və gənc nəsli əsrlər boyu böyük sınaqlardan çıxmış bu mənəvi, əxlaqi dəyərlər ruhunda tərbiyələndirməliyik” bu müdrik sözlər, dəyərli fikirlər Ulu öndər Heydər Əliyevin gənclərimizin milli-mənəvi dəyərlər əsasında tərbiyələnməsinin vacibliyini vurğuladığı önəmli çıxışlarındandır. Məhz fevralın 2-si “Aşıq Şəmşir” Mədəniyyət Ocağı İctimai Birliyi tərəfindən Gənclər Gününə həsr olunmuş “Milli-mənəvi dəyərlərin qorunmasında gənclərin rolu” mövzusunda keçirilmiş tədbir də Ümummilli liderin gənclərlə bağlı qurduğu möhtəşəm siyasətə bu işıqlı amala, söylədiyi dəyərli fikirlərə gəncləri kökləmək, bu milli-mənəvi dəyərlərə daim sadiqliyi gənclərdəaşılamaq məqsədi daşıyırdı.
Kaspian Plazada təşkil olunmuş tədbirdə, Kəlbəcər rayon gəncləri, ziyalılar, jurnalistlər iştirak edirdi. Tədbirin təşkilatçısı İctimai Birliyin nümayəndəsi Həbib Misirov məclisi giriş sözü ilə açaraq, bu gün ölkə gənclərinin yüksək intellektə, biliyə, savada sahib olmaları üçün onlara yaradılmış hər cür imkanın, münbit şəraitin Ulu öndər Heydər Əliyevin qurmuş olduğu uğurlu gənclər siyasəti və hazırda isə Ümumilli liderin uzaqgörən siyasətini ölkə prezidenti İlham Əliyev tərəfindən uğurla davam etdirməsi sayəsində mümkün olduğunu bildirdi.
Gənclərə zəngin mənəvi duyğulu vətənpərvər kimi yetişmələrində Mübariz İbrahimov qəhrəmanlığını, mətinliyini, qorxmazlığını, ölməzliyini çıxışında örnək gətirən filologiya elmləri namizədi Məhərrəm Qasımlı hər bir gəncin daxilində belə gözəl əxlaqi keyfiyyətlərin cəm olmasını önəmsədi. Tədbirdə söz alan qabaqcıl Kəlbəcər rayon gəncləri də çıxışlarında dövlətin gənclərə verdiyi önəmdən danışaraq, bu qayğı və diqqəti hər zaman həyatlarında yüksək səviyyədə hiss etdiklərini söylədilər.
Tədbirin sonunda qonaqlara Ulu öndər Heydər Əliyev və ölkə prezidenti İlham Əliyevin müxtəlif vaxtlarda gənclərlə bağlı çıxışılarından, söylədikləri nitqlərindən ibarət maraqlı fraqmentlər nümayiş etdirildi.
Eldar İBRAHİMOĞLU, AZXEBER.COM
