“Müstəqilliyin ilk illərində ölkədə siyasi dayanıqsızlıq şəraitində Azərbaycanda 100-dən çox universitet yaranmışdı. Bu hadisələr işbaz adamların yaramaz hərəkətləri nəticəsində baş vermişdi. Lakin biz indi onların sayını minimuma endirmişik”. Bunu jurnalistlərə açıqlamasında təhsil naziri Misir Mərdanov deyib. Nazir bildirib ki, cəmiyyətimiz və təhsilimiz saxta diplomlarla işləyən adamlardan xilas olunmalıdır: “Ağır da olsa, biz bu işə başlamışıq və uğurla sona çatdıracağıq. Saxta diplomlu müəllimlərin dəqiq sayını deyə bilməsəm də, onların 300-dən çox olduğu bizə məlumdur. Bu şəxslərlə bağlı müvafiq sənədlər artıq lazımi orqanlara göndərilib”
M.Mərdanovun sözlərinə görə, dekabr ayında idarənin hesabatı təqdim olunacaq və monitorinqin nəticələri açıqlanacaq. Əgər vəsait ayrılarsa, idarə növbəti il də fəaliyyətini davam etdirəcək.
