“Mən bilmirəm ki, sizin kitablarda azərbaycanlılar barədə nə danışılır…”
Bu gün Bakıda Avronest Parlament Assambleyasının Sosial Məsələlər, Təhsil, Mədəniyyət və Vətəndaş Cəmiyyəti Komitəsinin iclası başlayıb.Təhsil naziri Misir Mərdanov Azərbaycan torpaqlarının 20 faizinin Ermənistan tərəfindən işğalı nəticəsində təhsil sisteminə dəyən zərbələrdən danışıb. Nazir hazırda Azərbaycanda 7 min xarici ölkə vətəndaşı olan tələbənin təhsil aldığını, azərbaycanlı tələbələrin Avropanın müxtəlif ali məktəblərində təhsil aldığını bildirib. Misir Mərdanov deyib ki, təhsillə bağlı hədəflərə nail olmaq üçün “Azərbaycan-2020 strateji proqramı” hazırlanır. Daha sonra təhsil naziri komitə üzvlərinin suallarını cavablandırıb. Milli azlıqların təhsili ilə bağlı sualları cavablandıran Misir Mərdanov Azərbaycanda mili azlıqların ana dillərində təhsil almaları üçün kənd məktəblərində belə şərait yaradıldığını söyləyib.Komitə üzvü, erməni deputat Aram Safaryanın “doğrudanmı sizin orta məktəb dərsliklərində ermənilər düşmən kimi təqdim edilir?” sualına Misir Mərdanov cavab verib ki, tolerantlığa müsbət yanaşır: “Ancaq xalqlarımız arasında çox böyük uçurum var. Bu tədbir də həmin uçurumu aradan qaldırmaq məqsədi daşıyır. Ancaq bu tədbirdə, yaxud 1 ildə bu istiqamətdə iş görmək, məsələni həll etmək çətindir. Mən bilmirəm ki, sizin kitablarda azərbaycanlılar barədə nə danışılır, siz də bilmirsiniz ki, bizim kitablarda sizin haqqınızda nə danışılır”.(lent.az)
