Moskvadakı “Ukrayna” mehmanxanasının konfrans zalında “Heydər Əliyev. Naməlum fotoşəkillər” adlı fotosərgi açılıb. Fotosərgi görkəmli siyasi və ictimai xadim, Azərbaycan xalqının ümummilli lideri Heydər Əliyevin anım gününə həsr edilib.Azərbaycan Respublikasının Rusiya Federasiyasındakı səfirliyi tərəfindən təşkil edilmiş sərgidə görkəmli siyasətçinin həyatının Moskva dövrü ilə bağlı fotoşəkillər nümayiş etdirilir.Azərbaycan Respublikasının Rusiya Federasiyasındakı səfiri Polad Bülbüloğlu sərgini açaraq bu görkəmli dövlət xadiminin sovet tarixində rolu barədə məlumat verib. Onun sözlərinə görə, 1984-cü ildə Sov. İKP MK Siyasi Bürosunun üzvü, SSRİ Nazirlər Sovetinın sədrinin birinci müavini və Nazirlər Sovetinin Baykal-Amur Magistralının (BAM) tikintisi üzrə komissiyasının rəhbəri olan Heydər Əliyev BAM tikintisinin yekun mərhələsi çərçivəsində işləri yoxlamalı olan hökumət nümayəndə heyətinə başçılıq edib. “İrkutskda çıxan “Vostoçno-Sibirskaya pravda” qəzetinin fotomüxbiri Valeri Karasev bu nümayəndə heyətini Ust-Kutdan başlamış Sakit okeana qədər bütün yol boyu müşayiət edib, Heydər Əliyevin BAM qəhrəmanları və yerli rəhbərlərlə görüşlərini əks etdirən fotoşəkillər çəkib. V.Karasev həmin səfər zamanı çəkilmiş 1600-dən çox fotoşəkli qayğı ilə qoruyub saxlayıb və bu yaxınlarda bütün bu zəngin materialı Azərbaycan Respublikasının Rusiya Federasiyasındakı səfirliyinə təqdim edib. Bizim ümumi tariximizin və görkəmli siyasi xadimin həmin tarixə böyük töhfəsinin sənədli sübutu olan bu unikal fotoşəkillərin bir qismi ilk dəfə bu gün burada nümayiş etdirilir. Bu nadir fotoşəkillərin hamısı Heydər Əliyev Fonduna hədiyyə ediləcək”. - Polad Bülbüloğlu deyib.“İnterfaks-Azərbaycan” informasiya agentliyinin baş direktoru, vaxtilə Heydər Əliyevin təhlükəsizlik xidmətinin rəhbəri olmuş Aleksandr İvanov böyük siyasi xadimin bir neçə il işlədiyi Moskvada onun xatirəsinə həsr edilmiş fotosərgi təşkil edilməsini əlamətdar hadisə adlandırıb. A.İvanov nəinki Azərbaycan tarixində, həm də bütövlükdə sovet dövrünün tarixində dərin iz qoymuş bu nadir insan haqqında xatirələrini bölüşüb.Fotoşəkillərin müəllifi V.Karasev görkəmli siyasətçi Heydər Əliyevin həyatının bu dövrünü əks etdirən fotosərginin təşkilatçılarına təşəkkürünü bildirib. Həmin fotoşəkilləri qayğı ilə qoruyub saxladığını qeyd edən V.Karasev ona belə böyük bir şəxsiyyətlə işləmək nəsib olduğuna görə məmnun olduğunu bildirmişdir. “Mən gələcəkdə Heydər Əliyev Fondunda layiqli yer tutacaq bu fotoşəkilləri böyük məmnuniyyətlə Azərbaycan səfirliyinə təqdim etmişəm”, - Fotoqraf deyib.
