Tanınmış müğənni Murad Arif bəzi media qurumlarında adından yayılan açıqlamanı təkzib edib.
AZXEBER.COM xəbər verir ki, müğənni deyib ərəb dili ilə bağlı heç bir məlumat paylaşmayıb:
"Mətbuatda bu gün haqqımda yayılan xəbərlə bağlı heç bir açıq istinad linki yoxdur və ola da bilməz.
"Mənim şəxsən istifadə etdiyim yeganə Facebook səhifəsi budur və burada paylaşımları öz adımdan, şəxsən özüm edirəm.
Instagram, TikTok və Facebook səhifələrim də öz adımla fəaliyyət göstərən, təsdiqlənmiş rəsmi hesablarımdır.
Burada yazıb paylaşdıqlarımdan başqa, adımla bağlı yayılan istənilən xəbəri yanlış, şayiə və iftira hesab edin”.
Qeyd edək ki, bu gün bəzi KİV-lərdə müğənninin adından "Ərəb dilində molla sədaları nə üçündür? Nə qatır məclis əhlinə? İnsan anlamadığı, başa düşmədiyi avazdan nəyisə idrak edərmi? Bunu niyə yığışdırmırıq adətimizdən? Allah birdir, bəli. Allah böyükdür, bəli. Allahın rəhməti olsun bizlərlə, bəli. Amma bu oxumaqların məsələyə nə dəxli?” deyə açıqlama yayılıb.
