"Bundan öncəki parlament seçkilərində V və VI çağırış Yeni Azərbaycan Partiyasını (YAP) Gəncə şəhərindən 38 saylı seçki dairəsindən təmsil etmişəm".
Bu sözləri AZXEBER.COM-a açıqlamasında Milli Məclisin deputatı Naqif Həmzəyev qarşıdan gələn növbədənkənar parlament seçkilərindən danışarkən deyib.
Deputat bildirib ki, YAP sədri tərəfindən ona etimad göstərilərsə, seçkilərdə aktiv şəkildə iştirak edəcək:
"Əgər cənab Prezident İlham Əliyev - partiyamızın sədri tərəfindən mənə etimad göstərilərsə, təbii ki, mən bu seçkilərə aktiv şəkildə qatılacam və nəzərinizə çatdırım ki, ilk növbədə YAP-ın proqramının həyata keçirilməsi və cənab Prezidentin müəyyənləşdirdiyi xarici və daxili siyasətin tanıdılması, təbliğ edilməsi, yerlərdə daha geniş icrasının reallaşdırılmasıyla bağlı fəaliyyətimi aktiv şəkildə quracam. Bununla yanaşı, seçicilərimizin, vətəndaşların bizə ünvanladığı müraciətləri həmişə aidiyyati orqanlara çatdırmaq, ali tribunadan səsləndirmək və bütün bunlardan savayı, özümün də müşahidə etdiyi bir çox məsələlərin həllinə çalışacağam".
Millət vəkili hesab edir ki, budəfəki parlament seçkilərində də YAP qalib gələcək:
"İnanıram ki, budəfəki parlament seçkilərində də YAP qələbə qazanacaq. Mən öncədən seçkilərin uğurlu olmasını arzulayıram və Yeni Azərbaycan Partiyasının (YAP) bütün namizədlərinə bu seçkilərdə müvəffəqiyyətlər arzu edirəm. Yeni dövrdə, yeni parlamentin daha faydalı və məhsuldar fəaliyyət göstərəcəyinə ümidliyəm. Bu seçkinin ölkəmiz üçün xeyirli-uğurlu olmasını diləyirəm".
Mikayıl Mirzəzadə
