Bakıda keçirilən xüsusi əməliyyata rəsmi münasibət bildirilib.
Daxili İşlər Nazirliyinin mətbuat xidmətindən APA-ya verilən məlumata görə, oktyabrın 18-i axşam saatlarında paytaxtın Qaraçuxur qəsəbəsində əvvəllər məhkum olunmuş bir qrup şəxsin toplantı keçirməsi barədə nazirliyin Baş Mütəşəkkil Cinayətkarlıqla Mübarizə İdarəsinə əməliyyat məlumatı daxil olub.
Məlumat araşdırılıb və təsdiqini tapandan sonra hadisə yerinə əməliyyat qrupu çıxıb. Əməliyyat zamanı toplantıda iştirak edən şəxslər saxlanılıb. Hazırda faktla bağlı araşdırma aparılır.
DİN-in mətbuat xidmətindən həmçinin bildirilib ki, bəzi mətbuat orqanlarında əməliyyat zamanı atışma baş verməsi, nəticədə ölən və yaralananların olması barədə məlumatlar həqiqətə uyğun deyil.
Ötən gün saat 21.00 radələrində hüquq-mühafizə orqanları Bakının Qaraçuxur qəsəbəsində yerləşən «Yağmur» şadlıq evində xüsusi əməliyyat keçirib. Əməliyyat zamanı kriminal aləmlə əlaqəsi olan avtoritetlərin saxlandığı bildirilir.
"Yeni Müsavat"ın əməkdaşının verdiyi xəbərə görə, hadisənin baş verdiyi "Yağmur" restoranı gücləndirilmiş polis mühasirəsində saxlanılır. Daha bir məlumat ondan ibarətdir ki, hücuma məruz qalan və həbs olunan şəxslər Ramiz adlı şəxsin toy mərasiminə yığışıblarmış.
