Təl-Əvivə uçan "Flydubai” təyyarəsinin komandirinə hücum edən ikinci pilotun təkbaşına hərəkət etdiyi ehtimal olunur.
Bu barədə NBC News İsrail təhlükəsizlik strukturlarının keçmiş əməkdaşına və istintaqın gedişi ilə tanış olan bir neçə ABŞ administrasiyası rəsmisinə istinadən məlumat yayıb.
Telekanal qeyd edir ki, araşdırma hələ ilkin mərhələdədir.
"Hazırkı qiymətləndirmə onun təkbaşına hərəkət etdiyini göstərir. İndiki mərhələdə bu, internetdə aşkarlanan ekstremist məzmunun təsiri altına düşmüş ‘tənha canavar’ın terror aktı kimi görünür”, – İsrailin Ümumi Təhlükəsizlik Xidmətinin (ŞABAK) keçmiş əməkdaşı Şalom Ben Hanan bildirib.
Sentyabrın 30-da Dubaydan Təl-Əvivə uçan "Flydubai” reysi təhlükəsizlik insidenti səbəbindən Səudiyyə Ərəbistanının Təbuk şəhərindəki hava limanına təcili eniş edib.
Oktyabrın 1-də Səudiyyə Ərəbistanının Daxili İşlər Nazirliyi hadisəyə ikinci pilotun təyyarə komandirinə hücumunun səbəb olduğunu təsdiqləyib. Nəticədə hər iki pilot müxtəlif dərəcəli xəsarətlər alıb.
Nazirlik bildirib ki, səhhətləri yaxşılaşdıqdan sonra hər iki pilot BƏƏ təhlükəsizlik qüvvələrinin əməkdaşlarının müşayiəti ilə Əbu-Dabiyə yola salınıb. Ekipajın digər altı üzvü isə daha əvvəl təhlükəsiz şəkildə Dubaya qayıdıb.
BƏƏ hakimiyyəti hadisənin səbəb və şəraitinin araşdırılmasını, o cümlədən uçuşun istismarı ilə bağlı məqamların və təhlükəsizlik tədbirlərinin yoxlanılmasını davam etdirir.
///teleqraf///
