"Nəriman Həsənzadənin şeirləri gələcək nəsillər üçün örnək olacaq".
Bu sözləri Beynəlxalq Muğam Mərkəzində keçirilən Xalq şairi Nəriman Həsənzadə ilə vida mərasimində Azərbaycan Mətbuat Şurasının sədri Rəşad Məcid deyib.
O bildirib ki, Nəriman Həsənzadə ilə bağlı ən unudulmaz xatirələrindən biri 2015-ci ilə təsadüf edir:
"Nəriman müəllimlə bağlı ən xoş xatirələrimdən biri 2015-ci ilə aiddir. Həmin il Qazaxa getmişdim. Nəriman müəllim bunu eşidəndə çox sevindi və Qazax səfərimlə bağlı mənə bir şeir yazmışdı".
Rəşad Məcid qeyd edib ki, Xalq şairi Azərbaycan ədəbiyyatına və mədəniyyətinə misilsiz töhfələr verib:
"Nəriman müəllimin şeirləri, dram əsərləri, poemaları Azərbaycan mədəniyyətinin qiymətli nümunələridir. Xüsusilə Vətən müharibəsindəki Zəfərimizdən sonra Azərbaycan Ordusuna, əsgərlərimizə, şəhidlərimizə və Ali Baş Komandana həsr etdiyi şeirlər yüksək vətənpərvərlik ruhu ilə seçilir".
O vurğulayıb ki, Nəriman Həsənzadənin yaradıcılığı uzun illər yaşayacaq:
"Nəriman müəllimin şeirləri Azərbaycan dilinin ən gözəl çalarlarını özündə ehtiva edir. İllər keçəcək, nə qədər ki, Azərbaycan dili yaşayacaq, Nəriman Həsənzadənin şeirləri də yeni nəsillər üçün örnək olacaq, dillər əzbəri kimi yaşayacaq. Ruhu şad olsun".
Fəridə Əsədzadə
