Türkiyənin tanınmış müğənnisi Burak Kut gələn həftə Azərbaycana gələcək. Sənətçinin Bakıya səfəri 6 ölkədə ortaq olaraq keçiriləcək “Avrasiya ulduzu” mahnı yarışmasında Azərbaycandan iştirakçı seçməkdir.
Bunu APA-ya açıqlamasında Bakıda səfərdə olan yarışmanın baş koordinatoru Nihal Dudu deyib. O bildirib ki, sənətçi oktyabrın 10-da Bakıya gələcək və bu ayın 11-i və 12-də Azərbaycanda seçimlər keçiriləcək: ““Avrasiya ulduzu” yarışması 6 ölkədə gerçəkləşəcək və ortaq canlı yayım həyata keçiriləcək. Bu yarışmada Türkiyə, Azərbaycan, Şimali Kipr Türk Cümhuriyyəti, Türkmənistan, Qazaxıstan və Qırğızıstan iştirak edəcək. Burak Kut Türkiyədən əsas və daimi münsif heyətidir. O səbəbdən də şəxsən Burak Kut bütün iştirakçı ölkələrə gedib seçimlərdə iştirak edəcək. Eyni zamanda hər ölkənin öz münsif heyəti olacaq”.
N. Dudu onu da bildirib ki, yarışma “TRT Avaz”la ortaq yayımlanacaq və artıq müsabiqənin seçimləri ilə bağlı gündəlik verilişlərin yayımına start verilib. Azərbaycandakı seçimlər İctimai Televiziya və Radio Yayımları Şirkətinin studiyasında baş tutacaq. Azərbaycandan bu yarışmada iştirak etmək istəyənlər də məhz İctimai Teleradioya müraciət etməlidirlər: “Seçimlərdə iştirakçı sayı qoyulmayıb. İstər Azərbaycandan, istərsə də digər iştirakçı ölkələrdən istənilən istedadlı şəxs seçimlərə qatıla bilər. Əvvəlcə hər ölkənin öz qalibi seçiləcək. Daha sonra isə artıq 6 iştirakçı arasından “Avrasiya ulduzu” seçiləcək”. Baş koordinatorun sözlərinə görə, qalib “Avrasiya ulduzu” adını qazanmaqla yanaşı, pul mükafatı ilə də təltif olunacaq.
