"Mənim göydə Allah, yerdə isə Lalə Azərtaşdan başqa güvəndiyim heç kəs yoxdur".
Bu sözləri AZXEBER.COM-a açıqlamasında Xalq artisti Fatma Mahmudova deyib.
Ağır sağlamlıq problemləri yaşayan aktrisa səhhətindən danışıb:
"Düzünü demək lazımdırsa, heç yaxşı deyiləm. Ağır insultdan sonra yıxıldım, qolum çiynimdən sındı. İndi onunla əlləşirəm, hələ də həkimlərdə qalmışam. Hazırda iltihab var, qolum kəsilə bilər. Belə olsa mən yaşaya bilmərəm, özümü öldürərəm. Bu onun üstünə atır, o bunun üstünə atır. Heç kim mənimlə maraqlanmır. Demək ki, mən heç kimə lazım deyiləm. Bir dərin təşəkkürüm Lalə Azərtaşadır. Bütün ümidlərim yalnız onadır. Sabah onun verilişində olacağam, məni həkimə göstərəcək. Yaxşı travmatoloqa ehtiyacım var. Bu çətin günlərdə anladım ki, mənim tək dostum Allahdır".
Xalq artisti aidiyyatı qurumların onun səhhəti ilə bağlı heç bir tədbir görmədiyini deyib:
"Bəs hanı bu aidiyyatı qurumlar? Niyə mənimlə maraqlanan yoxdur? Axı mən də insanam, mən də adamam... Abırıma qısılıb sakit oturmuşam. Bu qədər üzlər güldürmüşəm, insanlara sevinc bəxş etmişəm, budurmu layiq olduğum münasibət? Özümə qarşı çox ögey münasibət görürəm. Artıq yarımcan olub yaşayıram, buna yaşamaq demək olarsa... Köməyə ehtiyacım var, artıq maddi olaraq da xərcləri qarşılaya bilmirəm. Həyatım harda qırılar-qırılar, Allah Kərimdir. Heç kəsdən yox özümdən küskünəm, özümdən narazıyam. Amma ölməsəm sağ qalsam, İnşallah səhnələrə qayıdacağam!"
Aysel Hacızadə
