Mərakeşdə keçirilən parlament seçkisi başa çatıb. Seçkidə qeydiyyata düşmüş 13,4 milyon seçicinin 45 faizi iştrak edib. Daxili İşlər Nazirliyinin açıqlamasına görə, bu dəfə seçicilərin sayı 2007-ci ildə keçirilən seçki ilə müqayisədə daha çox olub. Bununla belə, bu göstərici rəsmilərin proqnozlarını doğrultmayıb. Onlar hökumətin keçirdiyi islahatlardan sonra xalqın canlanması ilə seçkidə daha çox seçicinin iştirak edəcəyinə ümid edirdilər.Xatırladaq ki, kral demokratiya tələbi ilə çıxış edən etirazçıların tələblərinə cavab olaraq konstitusiyaya bəzi dəyişikliklər etmiş və baş nazirə parlamenti yeniləmək üçün daha çox səlahiyyət vermişdi.Seçki məntəqələrinin bağlanması ilə səslərin hesablanması başlayıb. Qeyd edək ki, seçkilərin gedişi Mərakeşin müttəfiqləri və ABŞ tərəfindən izlənilib. Seçkidə 3200 müşahidəçi olub. Deputat mandatı üçün yarışan 31 partiyadan 5392 namizədin iştirak etdiyi seçkidə parlamentdə 395 yer uğrunda mübarizə gedib.Beynəlxalq müşahidəçilərdən biri Doktor Nizam Əssaf bildirib ki, seçki prosesi tam şəffaf keçib: "Biz səslərin təhlükəsizliyinə ciddi nəzarət olduğunu müşahidə etdik. Seçki komissiyası da həmçinin müşahidə aparırdı".
