Bu gün Müasir Müsavat partiyasının sədri Hafiz Haciyev haqqındaqalmaqallı xəbər yayılıb.
Məlumata görə, Hafiz Hacıyev 1992-93-cü illərdə “Azərbalıq” dövlət konserninin sədri vəzifəsində çalışdığı vaxtlarda Balıqçılar qəsəbəsinə gedib və orada balıqçılarla mübahisə yaranıb. H.Hacıyev üstündə gəzdirdiyi silahdan atəş açaraq bir balıqçını qolundan yaralayıb. “Xeberinfo” saytı yazır ki, bundan sonra qəsəbə sakinləri H.Hacıyevi yaxalayıb yaxşıca əzişdiriblər. Hətta onun xəz papağını əlindən alıb uzun müddət qəsəbənin mərkəzində bir dükanın qabağında saxlayıblar.
Sakinlər əlavə ediblər ki, H.Hacıyev qolundan yaralanan şəxsə külli miqdarda pul verərək onu susdurub.
Məsələylə bağlı AZXEBER.COM-a danışan partiya sədri belə bir hadisənin baş vermədiyini və bunun ağ yalan olduğunu söyləyib:
“Bir neçə gün bundan öncə mən həmin saytların birində İsa Qəmbərin növbəti təxribatının üstünü açmışdım. Bundan sonra görünür, bunlar mənim haqqımda başqa bir şey tapa bilməyiblər və belə əsassız informasiyalar yayıblar. Onu da deyim ki, mənim “Azərbalıq” dövlət konserninin sədri vəzifəsində çalışdığım vaxtlarda balıqçıların həyat şəraiti çox yaxşı idi. Bütün o regionda araşdırma aparsanız görərsiniz ki, məni orada hər zaman toy-bayramla qarşılayırdılar. Həmin vaxtlarda Qəmbərov İsanın təyin etdiyi icra başçıları rüşvətlə işləyirdi və onlardan rüşvət almaq istəyirdilər. Mən də onlara deyirdim ki, əgər hansınızsa rüşvət versəniz sizi işdən qovacam. Onlar buna görə bu gün də mənim hörmətimi saxlayırlar. Qətiyyən elə bir hadisə olmayıb”.
Hafiz Hacıyev belə informasiyaların yayımlanmasını ona qarşı yönələn növbəti təxribat kimi qiymətləndirib:
“Bu birbaşa seçkiqabağı təxribatdır. Əgər elə bir hadisə olsaydı, o dövrdə baş nazir olan Pənohov Hüseyn və hakimiyyətdə olan Kərimov Əli niyə bir tədbir görmürdü? Niyə cinayət işi açmırdılar? Belə ağ yalanlar seçkiqabağı hələ çox olacaq. Ona görə mən heçnədən narahat deyiləm”.
Əfsələddin Ağalarov
