Xəbər verdiyimiz kimi, Ermənistanın baş naziri Nikol Paşinyanın istefa verməyə hazırlaşdığı və ölkəni növbədənkənar seçkilərə aparacağı iddia edilib.
Bu diqqətçəkən iddia ilə Paşinyanın sabiq müttəfiqi və deputat Ovik Ağazaryan çıxış edib.
Deputat xarici siyasətdə baş verən son hadisələrin növbədənkənar seçkilər üçün əlverişli zəmin yaratdığını və bunun hökumətin strateji maraqlarına xidmət edəcəyini güman edir.
Deputatın fikrincə, Paşinyanın siyasi mövqeyi yeni hüquqlar əldə etmək imkanı da yaradır.
Bəs, Ermənistandakı hazırkı hərc-mərclik, hakimiyyətdaxili böhranlar, kilsənin təzyiqləri yaxın gələcəkdə hansı proseslərə yol aça bilər?
Görəsən, rəsmi Kremlin Ermənistanın son addımlarına cavabı necə olacaq?
Həmçinin sözügedən iddianın reallaşması, Ermənistan hakimiyyətində dəyişiklik Azərbaycana nə dərəcədə təsir göstərəcək?
Məsələ ilə bağlı Milli Cəbhə Partiyasının sədr müavini, politoloq Məhəmməd Əsədullazadə AZXEBER.COM-a açıqlama verib.
Politoloqun dediklərinə görə, Ermənistanda Paşinyan hökumətinin istefa verməsindən sonra revanşist qüvvələr hakimiyyətə gələ bilər:
"Ermənistanda hakimiyyətin dəyişməsi potensial olaraq revanşistlərin hakimiyyəti ələ almasına gətirib çıxara bilər. Hazırda düşünmürəm ki, Ermənistanda hakimiyyətdaxili hərc-mərclik var. Bu ölkədə Paşinyan hökuməti proseslərə çox ciddi nəzarət edir. Təbii ki, müəyyən dövlətlərə işləyən qruplaşmalar mövcuddur. Orduda hələ də bəzi dövlətə bağlı qruplar var. Bu o demək deyil ki, Ermənistan hakimiyyəti üçün təhdid yaradır. Ermənistanda kilsənin keçirtdiyi aksiyalar da nəticəsini vermədi. Əlbəttə ki, Nikol Paşinyan hakimiyyətini gücləndirmək üçün növbəti növbədənkənar parlament seçkilərinə gedə bilər".
Siyasi şərhçi qeyd edib ki, Nikol Paşinyan hazırda çalışır ki, Köçəryan-Sarkisyan tandeminə qarşı öz hakimiyyətini qorusun:
"İndi parlamentdə bir sıra revanşist qrup yenə də Qarabağ məsələsini ön plana çıxarır, Azərbaycanın ərazi bütövlüyünə qarşı iddialar irəli sürən xəritələr yapışdırır. Göründüyü kimi, İrəvanda revanşistlər fəaldır. Onlar hakimiyyəti zəbt etsələr, bu region, Ermənistanın özü üçün də çox təhlükəli olacaq. Bu səbəbdən Nikol Paşinyan çalışır ki, hazırkı hakimiyyətini qorusun. Çünki Paşinyana indiki rəqibləri Köçəryan-Sarkisyan tandemi və kilsənin bu prosesdə onlara dəstək verməsidir. Şəksiz ki, Paşinyan hökuməti istefa versə, revanşist qüvvələr hakimiyyətə gələcək. Bu da Azərbaycanla yeni müharibə deməkdir. Bu mənada, bütün sülh danışıqlarının üzərindən xətt çəkilə bilər".
Mikayıl Mirzəzadə
