Gəncədə 81 yaşlı qadın evində qətlə yetirilib. Gəncə Şəhər Prokurorluğundan APA-ya verilən məlumata görə, hadisə ötən gecə Gəncə şəhəri, Əziz Əliyev küçəsi, 1-ci dalan, ev 2-də qeydə alınıb. Həmin ünvanda yaşayan, 1930-cu il təvəllüdlü Siddiqə İbrahim qızı Əliyeva naməlum şəraitdə qətlə yetirilib.
Gəncə Şəhər Polis İdarəsindən verilən məlumata görə, qətlə yetirilən 81 yaşlı Siddiqə Əliyeva Azərbaycan Daxili İşlər Nazirliyi Polis Akademiyasının rəis müavini Mahir Əhmədovun anasıdır. Hadisənin qarət məqsədi ilə törədildiyi bildirilir.
Hadisə yerinə əməliyyat qrupu gəlib. Meyitə baxış keçirən ekspertlər onun şərflə boğularaq öldürüldüyünü müəyyən ediblər. 81 yaşlı qadın öldürüldükdən sonra evdən qızıl-zinət əşyaları və pul götürülüb.
Baş vermiş hadisə ilə bağlı Gəncə Şəhər Prokurorluğu tərəfindən Cinayət Məcəlləsinin 120.2.5-ci (tamah məqsədi ilə və ya sifarişlə adam öldürmə) maddəsi ilə cinayət işi başlanıb.
Hazırda qətli törədən şəxs və ya şəxslərin müəyyən edilərək tutulması istiqamətində tədbirlər davam etdirilir.
