2012-ci ili başa vurmaq üzrəyik. Yeni il əhval-ruhiyyəsinin təsiri altında ilk sualımız belədir: 2013-cü ildən - xüsusən də futbolla bağlı - nə gözləyirsiniz?
- Portuqaliya Futbol Federasiyasının prezidenti kimi fəaliyyətimin ilk ilini başa vurmuşam və qeyd etməliyəm ki, futbolla bağlı nəzərdə tutduğumuz planları gerçəklişdirmək üçün hələ görüləcək çox işimiz var. Beynəlxalq aləmdə əsas hədəfimiz, sözsüz ki, 2014-cü ildə Braziliyada keçiriləcək dünya çempionatının seçmə mərhələsində uğurla çıxış etməkdir. Lakin hesab edirəm ki, rəqiblərimizin səviyyəsini nəzərə alsaq, bu, asan olmayacaq.
- Azərbaycan milli komandası barədə nə deyə bilərsiniz?
- Azərbaycan millisi hər mövsüm daha da püxtələşir və deyərdim ki, bizim komanda və eləcə də F qrupundakı digər rəqiblərlə keçirdiyi son oyunlar DÇ-2014-ün seçim mərhələsində bu komanda ilə hesablaşmaq lazım olduğunu bir daha sübut etdi. Mən oyunçular arasında olan həmrəyliyi və birgə oyun tərzini yüksək dəyərləndirirəm və hesab edirəm ki, bu komandanıza gələcəkdə daha yaxşı nəticələr əldə etməyə kömək edəcək.
- Ümumilikdə, DÇ-2014-ün seçmə mərhələsində keçirilən oyunların nəticələrini necə dəyərləndirərdiniz?
- Etiraf etmək lazımdır ki, bəzi nəticələr tam bizim istədiyimiz kimi olmadı və hazırda F qrupunda üçüncü mövqedə yer almışıq. Seçmə mərhələdə bizi daha 6 oyun gözləyir və hesab edirəm ki, hazırkı 2 qələbə, 1 bərabərlik və 1 məğlubiyyətlə biz sonrakı nəticələrin daha yaxşı olmasını gözləyirik.
