Miçiqan Universitetinin tədqiqatçıları tərəfindən aparılan və Journal of Social and Personal Relationships jurnalında yayımlanan geniş araşdırmada münasibətlərdə oxşarlığın rolu araşdırılıb. Alimlər 339 elmi tədqiqatı təhlil edərək cütlüklərin məmnuniyyətinə təsir edən əsas amilləri müəyyənləşdirməyə çalışıblar.
Araşdırmanın nəticələrinə görə, tərəfdaşların eyni dəyərləri, düşüncələri və həyat tərzini paylaşdıqlarını hiss etmələri münasibətlərin daha xoşbəxt olmasına kömək edir.
Mütəxəssislər bildirirlər ki, insanlar özlərinə bənzəyən şəxslərlə münasibət qurarkən daha çox anlaşılma və qəbul edilmə hissi yaşayırlar. Bu isə qarşılıqlı bağlılığı gücləndirə bilər.
Araşdırmada illərdir müzakirə edilən "zidd qütblər bir-birini cəzb edir” fikri də qiymətləndirilib. Nəticələr göstərib ki, fərqli xarakterlərin münasibəti avtomatik olaraq daha güclü etdiyi barədə kifayət qədər elmi sübut yoxdur.
Məsələn, eyni dəyərlərə sahib olduqlarını düşünən, həyat tərzlərinin uyğun olduğuna inanan və romantik gözləntilərinin üst-üstə düşdüyünü hiss edən cütlüklərin münasibətlərindən daha çox razı qaldığı müəyyən edilib.
Tədqiqatçılar qeyd edirlər ki, həqiqi oxşarlıq daha çox yaş, təhsil səviyyəsi və sosial-iqtisadi vəziyyət kimi xüsusiyyətlərdə özünü göstərir. Lakin münasibətlərin xoşbəxtliyinə ən güclü təsir edən amil tərəfdaşların bir-birini necə qəbul etməsidir.
/demokrat.az
