30 iyun 2014-ci il tarixində Azərbaycan Talassemiya Federasiyası və “Qan Donorları Assosiasiyası” İctimai Birliyi arasında respublikada qan donorluğunun inkişafı istiqamətində birgə əməkdaşlığın qurulması məqsədi ilə ikitərəfli rəsmi iclas keçirilmişdir.
“Qan Donorları Assosiasiyası”nınmətbuat xidmətinin verdiyi məlumata əsasən, görüşün əsas məqsədi yaxın gələcəkdə gənclərin qan donorluğuna cəlb olunması, maarifləndirilməsi və gənclər arasında qan donorluğu mədəniyyətinin formalaşdırılması istiqamətində birgə əməkdaşlığın əldə olunmasıdır.Hər iki birlik həyata keçirəcəkləri layihələrdə irsi qan xəstəlikləri və qan donorları arasında şəbəkənin qurulmasında vasitəçilik etmək niyyətində olduğunu gündəmə gətirmişdir. Görüşdə Azərbaycan Talassemiya Federasiyasının prezidenti Nailə Quliyeva və vitse-prezidenti Gülgün Abbasova, eyni zamanda Qan DonorlarıAssosiasiyasının sədri Fuad Əsgərov və birliyin mətbuat katibi Ədalət Şahbazov iştirak etmişlər.
Qeyd edək ki, Qan Donorları Assosiasiyası artıq 5 ilə yaxın müddətdir ki, respublikada qan donorluğunun inkişafı sahəsində fəaliyyət göstərməklə, gənclərin könüllü qanvermələrə cəlb olunması üçün məqsədyönlü layihələr həyata keçirməkdədirlər. Birliyin əsas məqsədi irsi qan xəstəliklərindən əziyyət çəkən uşaq və yeniyetmələrin qana olan ehtiyacının ödənilməsində gənclərin fəal sürətdə iştirakını təmin etməkdir.
“Azərbaycan Talassemiya Federasiyası” İctimai Birliyinin əsas məqsədlərindən biri də qan donorluğu haqqında paytaxtda və Azərbaycanın regionlarında ictimaiyyət arasında maarifləndirmə işini aparmaq və qarşıya çıxan qan problemlərini aradan qaldırmaq üçün əhalini və dövlət qurumlarını cəlb edərək, qanvermə kampaniyaları təşkil etmək, Azərbaycanda qan donoru fəaliyyəti ilə bağlı təbliğatı gücləndirmək, donorluq mədəniyyətini, xüsusən korporativ donorluq ideyalarını geniş təbliğ etməkdən ibarətdir.
