Qəddafinin oğlu: "Atam Tripolidədir"

Liviya diktatoru Müəmmar Qəddafinin oğlu Seyf əl İslam nə üsyançıların əlindədir, nə də onu əsir götürüblər. BBC-nin müxbiri Tripolidən məlumat verib ki, Seyf əl İslam zirehli avtomobildə əcnəbi jurnalistlərin qaldığı mehmanxanaya gəlib və yaranmış vəziyyətlə bağlı onlara açıqlama verib. 

Metyu Prays deyib ki, müxbirlərdən biri Seyf əl İslamdan atasının Tripolidə olub-olmadığını soruşub. O isə cavabında “əlbəttə atam buradadır”, deyə bildirib: “Müəmmar Qəddafi hazırda Tripolidədir və təhlükəsiz yerdədir”.  Onun sözlərinə görə, əsas güc artıq Qəddafinin tərəfindədir: “Biz üsyançıların onurğa sütununu qıra bildik. Bu, tələ idi. Onların həyatını daha da ağırlaşdırdıq, ona görə də qalib gəlirik”.  "Biz buradayıq! Bu bizim ölkədir. Bu bizim xalqımızdır və biz burada yaşayırıq. Biz qalib gələcəyik, çünki xalq bizimlədir". Bu sözləri Liviya rəhbəri Müəmmar Qəddafinin kiçik oğlu Seyf əl İslam BBC-yə müsahibəsində bildirib.  Qeyd edək ki, Qəddafinin dəqiq harada olduğu bu vaxtadək hələ də məlum deyil. Onun Bab-əl-Əzizə malikanəsini Qəddafiyə sadiq qüvvələr mühafizə edir.  Adı çəkilməyən diplomatlardan birinin ehtimallarına görə, Qəddafi məhz bu malikanədə ola bilər. Artıq bir neçə aydır ki, Qəddafi ictimaiyyət arasında görünmür, lakin dəfələrlə dövlət KİV-də canlı yayımda bəyanatlarla çıxış edib.  Bazar günü yayımlanan sonuncu bəyanatında Qəddafi Tripoli əhalisini şəhəri üsyançılardan xilas etməyə səsləmişdi.  BBC-nin müxbiri yazıb ki, ölkəyə kimin nəzarət etməsini aydınlaşdırmaq mümkün deyil. Şənbə günündən etibarən şəhərin bir sıra rayonları müxalifətin nəzarətindədir, lakin bununla belə küçələrdə Qəddafinin də qoşunlarının hərəkət etdiyini görmək mümkündür.