Xəbər verdiyimiz kimi, əmək və əhalinin sosial müdafiəsi naziri Anar Əliyevin imzaladığı əmrlə Paşayev Hüseyn Ələsgər oğlu Dövlət Tibbi Sığorta və Ekspertiza Agentliyinin İdarə Heyətinin sədr müavini təyin edilib.
AZXEBER.COM "Unikal"a istinadən məlumat verir ki, yeni sədr müavini təyin edilən Hüseyn Paşayev mərhum deputat Qənirə Paşayevanın qardaşıdır.
H.Paşayev bundan əvvəl Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondunun Sosial Sığorta və Fərdi Uçot üzrə Mərkəzi Filialının direktoru idi.
Qeyd edək ki, Qənirə Paşayeva 2023-cü ilin sentyabrın 23-də səhhətində yaranmış ciddi problemlərlə əlaqədar Mərkəzi Xəstəxananın reanimasiya şöbəsinə yerləşdirilib. Naməlum mənşəli hipotonik vəziyyət diaqnozu qoyulan Q.Paşayevanın səhhətindəki kritik durumla əlaqədar Mərkəzi Klinik Xəstəxananın həkim personalı və Türkiyədən cəlb edilmiş həkim mütəxəssislər tərəfindən bütün zəruri tədbirlər görülüb. 28 sentyabr 2023-cü ildə Qənirə Paşayeva 48 yaşında vəfat edib və 29 sentyabr 2023-cü ildə İkinci Fəxri Xiyabanda dəfn olunub.
