Xəbər verdiyimiz kimi, şair Qəşəm Nəcəfzadə Azərbaycan Respublikası Audiovizual Şurasının üzvü təyin edilib.
Təyinatla bağlı məlumat Audiovizual Şuranın rəsmi saytında açıqlanıb.
Qəşəm Nəcəfzadə Prezidentin 08 oktyabr 2025-ci il tarixində imzaladığı Sərəncam ilə bu vəzifəyə təyin olunub.
Qəşəm Nəcəfzadə bununla bağlı təəssüratlarını AZXEBER.COM-a bölüşüb.
O bildirib ki, bu ona göstərilən böyük hörmətdir:
"Əlbəttə, sevinirəm, həm də çox sevinirəm. Bu, böyük hörmət və diqqətdir. Bu sahədə göstərilən ehtirama görə minnətdaram. Mən televiziyanı çox sevirəm, veriliş aparıram. Ədəbiyyatı da çox sevirəm. Radio və televiziya sahəsində dərs deyirəm. Azərbaycan dilini çox yaxşı bilirəm. Amma Azərbaycan dilində danışmaq, onu yaxşı bilmək demək deyil. Mənə göstərilən diqqətə yalnız sevinə bilərəm”.
Şair deyib ki, sözügedən qərar çoxdan verilib:
"Audiovizual Şuranın saytında bu məlumat artıq yerləşdirilib. Sadəcə olaraq, mən onu indi paylaşdım. Təxminən 26 gün əvvəl bu qərar qəbul edilib. Mən özüm paylaşdığım üçün media nümayəndələri bundan xəbər tutdular”.
Q.Nəcəfzadə vurğulayıb ki, Azərbaycan xalqının mənəvi cəhətdən zənginləşməsi üçün əlimizdən gələni etməliyik:
"Azərbaycan xalqının mənəvi cəhətdən zənginləşməsi üçün əlimizdən gələni etməliyik. Cənab Prezident İlham Əliyev hər zaman Azərbaycan dilinin zənginliyini vurğulayır. Təəssüf ki, dilimizə qarşı xor baxanlar da var. Dil inkişaf etməlidir, çünki dil bir millətin kimliyidir. İlham Əliyev Azərbaycan dilində çox gözəl danışır. Müharibə vaxtı deyirdi: "Bulanıq suda balıq tutmaq olmaz.” O, daima Azərbaycan dilinin zənginliyindən istifadə edir”.
Şahanə Ziyad
