Azərbaycan-Slavyan Gəncləri Assosiasiyasının sədri: “Nə mənə, nə də əməkdaşlıq etdiyim onlarla QHT-yə bu barədə sorğu daxil olmayıb. Vətəndaş cəmiyyətinin üzvü kimi bizim mövqeyimizi araşdırılmayıb. Demək ki, onların özlərinə də bu maraqlı deyil. Onlara maraqlı olan Xədicənin, Leylanın aldıqları milyonlar hesabına verdikləri raportlardır”.
Bu sözləri AZXEBER.COM-a açıqlamasında Azərbaycan-Slavyan Gəncləri Assosiasiyasının sədri Səbuhi Abbasov söyləyib. O, “Human Rights Watch” təşkilatının Azərbaycanla bağlı növbəti hesabatını təxribat adlandırıb.
Assosiasiya sədrinin sözlərinə görə, bu təşkilat Avropa insanının gözündə Azərbaycanla bağlı mənfi rəy yaratmağa çalışır:
“Düşünürəm ki, bu təşkilatların verdiyi hesabatlar onlardan başqa heç kimə maraqlı deyil. Çünki hər kəs bu qurumların hansı prinsiplərlə işlədiyi çox gözəl bilir. Belə olmasaydı hesabatlar daha dürüst və müqayisəli şəkildə aparılardı. Cənubi Qafqazda demokratiyanın, multikultralizmin, bəşəri dəyərlərin, siyasi və vicdan azadlığının ən çox qorunduğu ölkə Azərbaycandır. Bunu bütün dünya qəbul edir və bu səpkidə keçirilən bütün beynəlxalq forumların Bakıda keçirilməsinə maraq göstərir”.
S.Abbadov hesabatda Azərbaycanda son iki ildə əsassız ittihamlarla azı 50 müstəqil və müxalif siyasi fəalları, jurnalist, blogger və hüquq-müdafiəçilərinin həbs edilməsi və onların əksəriyyəti hələ də həbsdə saxlanılması ilə bağlı qeyd edilən iftira dolu məlumatlara da münasibət bildirib.
QHT sədri “Human Rights Watch” təşkilatının Cənubi Qafqaz üzrə olan nümayəndəsini daha obyektiv olmağa səsləyib:
“Təşkilatın Cənubi Qafqaz üzrə nümayəndəsi Georgi Gogia əvvəlcə gedib Gürcüstanda illərdir saxlanılar yüzə yaxın siyasi məhbuslar haqqında sərt hesabatlar hazırlasın. Sonra digər ölkələrə keçər. Məncə o bunu etməz. Çünki Gürcüstan və Ermənistandakı çöküşə görə Avropa heç bir təşkilata “DILƏNÇİPAYI” verməz. Azərbaycanın artan iqtisadi və siyasi qüdrəti bir çox dövlətlər üçün qıcıq mənbəyi olduğundan burda “demokratiya boğulur” kimi absurd fikirlərin önə çəkilməsi daha asan gəlir mənbəyinə çevrilir. Hesab edirəm ki, bizim bəzi QHT-lər bu sahədə çox passivlik nümayiş etdirirlər. Biz bəzi məqamlarda cavab vermək və yaxud da sadəcə susmaq yolunu seçirik. Biz konkret olaraq bu təşkilatlara təzyiq göstərərək ədalətli hesabat hazırlanmasına nail olmalıyıq. Əks halda bu hesabatlar ayda, ildə bir dəfə yox, həftədə bir dəfə gələcək. Biz buna əhəmiyyət vermiyə bilərik. Lakin bizim susqunluğumuz dünya tərəfindən təsdiq kimi qəbul edilə bilər. Elə hesab edirəm ki, bu kimi bir çox ümummilli məsələlərdə biz daha innovativ üsullardan istifadə edərək ortaya konkret mövqe qoymalı və təsir metodunun yaradılması barədə düşünməliyik. Bu istiqamətdə aparılan siyasət sistemləşdirilməli, mərkəzləşdirilməlidir. Ölkəmizə qarşı aparılan qara piara informativ və operativ şəkildə STOP deyəcək səviyyədə güclənməliyik”.
